ജീത്തു ജോസഫ് സംവിധാനം ചെയ്ത മോഹൻലാൽ നായകനാകുന്ന ഏറ്റവും പുതിയ ചിത്രം നിർമ്മാണം ആരംഭിച്ചു. ‘നേര്’ എന്ന് പേരിട്ടിരിക്കുന്ന ചിത്രത്തിന്റെ സെറ്റിൽ അണിചേർന്ന വിവരം മോഹൻലാൽ ആണ് ഫേസ്ബുക്ക് പേജിലൂടെ ആരാധകരെ അറിയിച്ചത്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് ചിത്രം നിർമ്മിക്കുന്നത്.
‘സീക്കിംഗ് ജസ്റ്റിസ്’ എന്ന ടാഗ് ലൈനോട് കൂടിയാണ് പുതിയ ചിത്രത്തിന് ‘നേര്’ എന്ന് പേര് വെളിപ്പെടുത്തിയിരുന്നത്. ‘കോർട്ട് റൂം ഡ്രാമ’ വിഭാഗത്തിൽ പെടുന്ന ചിത്രമായിരിക്കും ഇതെന്ന് സൂചനയുണ്ട്. സംവിധായകൻ ജീത്തു ജോസഫും നടിയായ മായ ശാന്തിദേവിയും കൂടിയാണ് ചിത്രത്തിന്റെ രചന നിർവഹിച്ചിരിക്കുന്നത്. ജീത്തു ജോസഫിന്റെ ‘ദൃശ്യം 2’ എന്ന സൂപ്പർഹിറ്റ് ചിത്രത്തിൽ അഭിഭാഷകയായി അഭിനയിച്ച് ശ്രദ്ധ നേടിയ നടിയാണ് മായ ശാന്തിദേവി. പ്രിയാമണി, അനശ്വര രാജൻ എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.
ജീത്തു ജോസഫിന്റെ ദൃശ്യം2, ട്വൽത്ത് മാൻ, കൂമൻ എന്നീ ചിത്രങ്ങൾക്ക് ക്യാമറ ചലിപ്പിച്ച സതീഷ് കുറുപ്പ് തന്നെയാണ് നേരിന്റെയും ഛായാഗ്രഹണം നിർവഹിക്കുന്നത്. വിഷ്ണു ശ്യാം സംഗീതസംവിധായകനാകുന്ന നേരിന്റെ ഗാനങ്ങൾക്ക് വരികൾ രചിക്കുന്നത് വിനായക് ശശികുമാർ ആണ്. മോഹൻലാൽ-ജീത്തു ജോസഫ് കൂട്ടുകെട്ടിൽ ഒരുങ്ങുന്ന ചിത്രം എന്ന നിലയിൽ വലിയ പ്രതീക്ഷകളോടെയാണ് ആരാധകർ ഈ പുതിയ ചിത്രത്തെ കാത്തിരിക്കുന്നത്.
Discussion about this post