മുംബൈ: ഫ്ളൈറ്റ് അറ്റന്ഡന്റായ യുവതിയെ ഫ്ളാറ്റില് മരിച്ചനിലയില് കണ്ടെത്തി. മുംബൈ മരോലിലെ എന്.ജി. കോംപ്ലക്സില് താമസിക്കുന്ന രുപാല് ഒഗ്രേ (24) എന്ന യുവതിയേയാണ് ഞായറാഴ്ച രാത്രി ഫ്ളാറ്റില് മരിച്ചനിലയില് കണ്ടത്. കഴുത്തറത്തനിലയിലായിരുന്നു മൃതദേഹം.
ഛത്തീസ്ഗഢ് സ്വദേശിനിയായ രുപാല് എയര് ഇന്ത്യയിലെ ട്രെയിനിങ്ങിനായി ഏപ്രിലിലാണ് മുംബൈയിലെത്തിയത്. മരോലിലെ ഫ്ളാറ്റില് സഹോദരിക്കും ഇവരുടെ ആണ്സുഹൃത്തിനും ഒപ്പമായിരുന്നു ഇവരുടെ താമസം. ഫ്ളാറ്റിലുണ്ടായിരുന്ന മറ്റ് രണ്ട് പേരും എട്ടുദിവസം മുന്പ് നാട്ടിലേക്ക് മടങ്ങിയിരുന്നതായി പോലീസ് പറഞ്ഞു. ഇരുവരെയും വിവരം അറിയിച്ചിതായും അവര് മുബൈയിലേക്ക് തിരിച്ചതായും പോലീസ് വ്യക്തമാക്കി.
ഞായറാഴ്ച രാവിലെ രുപാല് കുടുംബാംഗങ്ങളുമായി വാട്സാപ്പ് വീഡിയോ കോളില് സംസാരിച്ചിരുന്നു. പിന്നീട് പലതവണ വിളിച്ചിട്ടും ഫോണ് എടുക്കാത്തതിനെ തുടര്ന്ന് കുടുംബാംഗങ്ങള് മുംബൈയിലുള്ള സുഹൃത്തുക്കളെ വിവരമറിയിച്ചു. ഇവര് ഫ്ളാറ്റിലെത്തി അന്വേഷിച്ചെങ്കിലും പ്രതികരണമുണ്ടായില്ല. പലതവണ കോളിങ് ബെല്ലടിച്ചിട്ടും വാതില് തുറക്കാതിരുന്നതോടെയാണ് സുഹൃത്തുക്കള് വിവരം പോലീസിനെ അറിയിച്ചത്. തുടര്ന്ന് പോലീസെത്തി ഡ്യൂപ്ലിക്കേറ്റ് താക്കോല് ഉപയോഗിച്ച് ഫ്ളാറ്റിന്റെ വാതില് തുറന്നതോടെയാണ് യുവതിയെ മരിച്ചനിലയില് കണ്ടത്.
കഴുത്തറത്തനിലയിലായിരുന്നു യുവതിയുടെ മൃതദേഹം കണ്ടെത്തിയത്. ഉടന്തന്നെ ആശുപത്രിയില് എത്തിച്ചെങ്കിലും നേരത്തെ മരണം സംഭവിച്ചതായി ഡോക്ടര്മാര് സ്ഥിരീകരിച്ചു. യുവതിയുടെ മരണം കൊലപാതകമാണെന്നാണ് പോലീസിന്റെ പ്രാഥമിക നിഗമനം. സംഭവത്തില് കൊലക്കുറ്റം ചുമത്തി കേസ് രജിസ്റ്റര് ചെയ്ത് പോലീസ് അന്വേഷണം ആരംഭിച്ചിട്ടുണ്ട്. കേസുമായി ബന്ധപ്പെട്ട് ഒരാളെ കസ്റ്റഡിയിലെടുത്തതായാണ് സൂചന.
Discussion about this post