കോട്ടയം : പരാജയപ്പെടുന്ന തിരഞ്ഞെടുപ്പുകളില് ബിജെപിയെ പഴിചാരി രക്ഷപെടുകയെന്നത് സിപിഎമ്മിന്റെ പതിവുശൈലിയാണ്. അണികളെ ആശയക്കുഴപ്പത്തിലാക്കാനും പാര്ട്ടിയുടെ വീഴ്ചകളും ഭരണവിരുദ്ധ വികാരവും മറച്ചുപിടിക്കാനുമാണ് ശ്രമം. ഇതേ തന്ത്രമാണ് പുതുപ്പളളിയിലും എംവി ഗോവിന്ദന് പുറത്തെടുക്കുന്നത്. പുതുപ്പള്ളി ഉപതിരഞ്ഞെടുപ്പില് ബിജെപി വോട്ട് ലഭിക്കാതെ ചാണ്ടി ഉമ്മന് ജയിക്കില്ലെന്നാണ് സിപിഎം സെക്രട്ടറിയുടെ പുതിയ നിലപാട്. ഇതോടെ പുതുപ്പള്ളിയില് ജെയ്ക്കിന്റെ പരാജയം തുറന്ന് സമ്മതിക്കുകയാണോ പാര്ട്ടി സെക്രട്ടറി എന്ന ആശയക്കുഴപ്പത്തിലാണ് അണികള്.
“ആരു ജയിക്കും, തോല്ക്കും എന്നത് വസ്തുനിഷ്ടമായിരിക്കുകയാണ്. ഇനി വെറുതേ അവകാശവാദങ്ങള് ഉന്നയിക്കേണ്ട കാര്യമില്ല. വലിയ അവകാശവാദമൊന്നും ഉന്നയിക്കുന്നില്ലെന്ന് ആദ്യമേ പറഞ്ഞതാണ്. വലിയ രീതിയിലുള്ള സംഘടന- രാഷ്ട്രീയപ്രവര്ത്തനത്തിന്റെ ഭാഗമായി ജയിക്കാന് സാധ്യതയുണ്ടെന്ന് തന്നെയാണ് നേരത്തേയും പറഞ്ഞത്. പോളിങ് കഴിഞ്ഞപ്പോഴും അതുതന്നെയാണ് പറയാനുള്ളത്”, ഗോവിന്ദന് പറഞ്ഞു. ബിജെപി വോട്ട് യുഡിഎഫ് വാങ്ങിയിട്ടുണ്ടോ എന്ന് തനിക്ക് സംശയമുണ്ടെന്നും ഇല്ലെങ്കില് മണ്ഡലത്തില് ജയം ഇടത് പക്ഷത്തിനൊപ്പമാകുമെന്നും ഗോവിന്ദന് കൂട്ടിച്ചേര്ത്തു.
“താഴെത്തട്ടിലെ കണക്കെല്ലാം കിട്ടിയിട്ടുണ്ട്. പ്രശ്നം ഇത്രയേയുള്ളൂ, ബിജെപിക്ക് പത്ത്- പത്തൊന്പതിനായിരം വോട്ടുണ്ട് അവിടെ. ആ ബിജെപി. വോട്ട് യുഡിഎഫ് വാങ്ങിയോ എന്ന് നല്ല സംശയമുണ്ട്. വോട്ടെണ്ണുമ്പോള് മാത്രമേ അത് മനസിലാകുകയുള്ളൂ. ബിജെപി. വോട്ട് വാങ്ങാതെ ചാണ്ടി ഉമ്മന് ജയിക്കില്ല. വാങ്ങിയിട്ടില്ലെങ്കില് ഞങ്ങള് ജയിക്കും”, സിപിഎം സംസ്ഥാന സെക്രട്ടറി അവകാശപ്പെട്ടു.
ആരു ജയിച്ചാലും വലിയ ഭൂരിപക്ഷമൊന്നും ഉണ്ടാവില്ല. വളരെ ചെറിയ ഭൂരിപക്ഷമേ ഉണ്ടാകുകയുള്ളൂ. പുതുപ്പള്ളിയിലെ വിധിയോടെ സര്ക്കാരിന്റെ ആണിക്കല്ല് ഉറയ്ക്കുകയാണ് ചെയ്യുക. ഫലം സര്ക്കാരിന്റെ ആണിക്കല്ല് ഇളക്കുന്നതാവുമെന്ന മുന് പ്രതിപക്ഷനേതാവ് രമേശ് ചെന്നിത്തലയുടെ പ്രസ്താവനയ്ക്ക് മറുപടിയായി അദ്ദേഹം പറഞ്ഞു.
Discussion about this post