ഒട്ടാവാ: കാനഡയിലെ പ്രവര്ത്തനങ്ങള് അവസാനിപ്പിച്ച് ഇന്ത്യന് വാഹന നിര്മ്മാതാക്കളായ മഹീന്ദ്ര. കാനഡ ആസ്ഥാനമായി പ്രവര്ത്തിക്കുന്ന മഹീന്ദ്രയുടെ അനുബന്ധ സ്ഥാപനമായ റെസണ് എയ്റോസ്പേസ് കോര്പ്പറേഷന്റെ പ്രവര്ത്തനങ്ങളാണ് കമ്പനി അവസാനിപ്പിച്ചത്. എന്നാല് ഇത് സംബന്ധിച്ച മഹിന്ദ്ര ഔദ്യോഗിക വിശദീകരണമൊന്നും ഇതുവരെ പുറത്ത് വിട്ടിട്ടില്ല. എന്നാല് ഇന്ത്യ കാനഡ ബന്ധത്തിലുള്ള ഉലച്ചിലാണോ ഇത്തരത്തിലൊരു തീരുമാനം എടുക്കാന് മഹീന്ദ്രയെ പ്രേരിപ്പിച്ചതെന്നും അഭ്യൂഹങ്ങള് ഉയര്ന്നിട്ടുണ്ട്.
റെസണ് എയ്റോസ്പേസ് കോര്പ്പറേഷന്റെ പ്രവര്ത്തനങ്ങള് അവസാനിപ്പിച്ചതായി സെപ്തംബര് 20ന് കമ്പനി സ്റ്റോക് എക്സ്ചേഞ്ചില് സമര്പ്പിച്ച അപേക്ഷയിലാണ് അറിയിച്ചിട്ടുള്ളത്. റെസണ് എയ്റോസ്പേസിന്റെ 11. 18 ശതമാനം ഓഹരികളാണ് മഹീന്ദ്ര കമ്പനിയുടെ കൈവശമുണ്ടായിരുന്നത്. 35 കോടി രൂപ ചെലവഴിച്ച് കമ്പനിയുടെ നിശ്ചിത ശതമാനം ഓഹരി 2018 ലായിരുന്നു മഹീന്ദ്ര ഏറ്റെടുത്തത്.
അതേസമയം റെസണ് എയ്റോസ്പേസുമായുള്ള ബന്ധം അവസാനിപ്പിച്ച വിവരം പുറത്ത് വന്നതോടെ ഓഹരി വിപണിയില് മഹീന്ദ്രയ്ക്ക് മൂന്ന് ശതമാനത്തിന്റെ ഇടിവുണ്ടായി. ബിഎസ്ഇയില് മഹീന്ദ്രയുടെ ഓഹരികള് 1.93 ശതമാനം ഇടിഞ്ഞ് 1,602.55 രൂപയിലാണ് വ്യാപാരം നടക്കുന്നത്.
Discussion about this post