ബംഗളുരു : 99 തവണ റോഡ് ട്രാഫിക് നിയമങ്ങൾ ലംഘിച്ച സ്കൂട്ടർ യാത്രികനെ ഒടുവിൽ അറസ്റ്റ് ചെയ്തിരിക്കുകയാണ് ബെംഗളൂരു ട്രാഫിക് പോലീസ്. ബംഗളുരു ബന്നാർഘട്ട റോഡിൽ വെച്ച് അടുത്തിടെ ഇയാൾ ട്രാഫിക് നിയമങ്ങൾ ലംഘിച്ചതായി പോലീസ് കണ്ടെത്തിയിരുന്നു. തുടർന്ന് നടത്തിയ പരിശോധനയിലാണ് ഇയാൾ പലപ്പോഴായി 99 തവണ ട്രാഫിക് നിയമങ്ങൾ ലംഘിച്ചിട്ടുള്ളതായി കണ്ടെത്തിയത്.
കഴിഞ്ഞദിവസം ഇയാളുടെ സ്കൂട്ടർ ട്രാഫിക് നിയമം ലംഘിക്കുന്നത് സമീപത്തുള്ള ഒരു കാറിന്റെ ഡാഷ്ബോർഡ് ക്യാമറയിൽ പതിഞ്ഞിരുന്നു. കാറുടമസ്ഥൻ ഈ ദൃശ്യങ്ങൾ സമൂഹമാദ്ധ്യമങ്ങളിൽ പോസ്റ്റ് ചെയ്തതോടെയാണ് ട്രാഫിക് പോലീസ് ഈ സ്കൂട്ടർ കണ്ടെത്താനായി ശ്രമങ്ങൾ ആരംഭിച്ചത്. തുടർന്ന് നടത്തിയ പരിശോധനയിലാണ് ഇയാൾ തുടർച്ചയായി നിയമലംഘനങ്ങൾ നടത്തുന്ന ആളാണെന്ന് കണ്ടെത്തിയത്.
56,000 രൂപയാണ് ഇയാൾ നിയമലംഘനങ്ങൾക്ക് പിഴയായി ഒടുക്കാൻ ഉണ്ടായിരുന്നത്. ഇതോടെ സ്കൂട്ടറിന്റെ രജിസ്ട്രേഷൻ നമ്പറിന്റെ അടിസ്ഥാനത്തിൽ യാത്രക്കാരനെ ട്രാഫിക് പോലീസ് പിടികൂടി. ഇയാളുടെ ഡ്രൈവിംഗ് ലൈസൻസ് റദ്ദാക്കാൻ റീജിയണൽ ട്രാൻസ്പോർട്ട് ഓഫീസിനോട് ശുപാർശ ചെയ്തിട്ടുണ്ടെന്നും പോലീസ് അറിയിച്ചു.
Discussion about this post