ചണ്ഡീഗഡ് : ഹരിയാനയിൽ നിന്നുള്ള 50 കർഷകർക്ക് പുതിയ പാർലമെന്റ് മന്ദിരത്തിലേക്ക് ക്ഷണം. ഒക്ടോബർ 13ന് പുതിയ പാർലമെന്റിൽ ഉപരാഷ്ട്രപതി ജഗ്ദീപ് ധൻഖർ സംഘടിപ്പിക്കുന്ന ഉച്ചഭക്ഷണ ലേക്കാണ് കർഷകർക്ക് പ്രത്യേക ക്ഷണം ഉള്ളത്. ഹരിയാന കൃഷി മന്ത്രി ജെ പി ദലാൽ ആണ് ഉപരാഷ്ട്രപതിയുടെ വിരുന്നിലേക്ക് ഹരിയാനയിലെ കർഷകരെ ക്ഷണിച്ച വിവരം വ്യക്തമാക്കിയത്.
രാഷ്ട്രത്തെ പോറ്റുന്നവരാണ് കർഷകർ. അവരുടെ അചഞ്ചലമായ സമർപ്പണത്തെ ആഘോഷിക്കുന്ന ഈ അസാധാരണ സംഭവം രാജ്യത്തിന് ഒരു നാഴികക്കല്ലായി മാറുമെന്നും ദലാൽ വ്യക്തമാക്കി. ഹരിയാന ദീർഘകാലമായി രാജ്യത്തിന്റെ കാർഷിക മേഖലയിൽ മുൻപന്തിയിലാണെന്നും അദ്ദേഹം ചൂണ്ടിക്കാട്ടി.
ഇത്തരത്തിൽ കർഷകർക്ക് പാർലമെന്റിൽ ഒരു ഉച്ചഭക്ഷണവിരുന്ന് നൽകുന്നതുവഴി കർഷകരെ ആദരിക്കുക മാത്രമല്ല, അവരുടെ കഠിനാധ്വാനവും അർപ്പണബോധവും പ്രതിബദ്ധതയും അംഗീകരിക്കപ്പെടുകയാണ് ചെയ്യുന്നത് എന്നും ദലാൽ സൂചിപ്പിച്ചു. രാജ്യത്തെ പോഷിപ്പിക്കുന്നവരും അതിനെ ഭരിക്കുന്നവരും തമ്മിലുള്ള ഭിന്നത ഇല്ലാതാക്കിക്കൊണ്ട് വയലുകൾ പാർലമെന്റിന്റെ വിശുദ്ധമായ ഹാളുകളെ കണ്ടുമുട്ടുന്ന ദിവസമായിരിക്കും അതെന്നും ഹരിയാന കൃഷി മന്ത്രി വ്യക്തമാക്കി.
