തിരുവനന്തപുരം: വരുന്ന ഒക്ടോബർ മാസത്തിൽ സംസ്ഥാനത്ത് ആവശ്യത്തിന് വൈദ്യുതി ലഭ്യമാകുമോ എന്നതിൽ കടുത്ത ആശങ്ക രേഖപ്പെടുത്തി കെ.എസ്.ഇ.ബി. മഴയുടെ അളവ് കുത്തനെ കുറയുകയും ചൂട് ക്രമാതീതമായി ഉയരുകയും ചെയ്യുന്ന സാഹചര്യമുണ്ടായാൽ സംസ്ഥാനം കടുത്ത വൈദ്യുതി ക്ഷാമത്തിലേക്ക് കൂപ്പുകുത്തുമെന്നാണ് വിലയിരുത്തൽ. ലോഡ്ഷെഡിംഗും വൈദ്യുതി നിയന്ത്രണങ്ങളും ഒഴിവാക്കാൻ ബോർഡ് അടിയന്തര നടപടികൾ ആരംഭിച്ചെങ്കിലും പ്രതിസന്ധി മറികടക്കുക എളുപ്പമാകില്ലെന്നാണ് വിവരം.
വൈദ്യുതി പ്രതിസന്ധി മുന്നിൽക്കണ്ട് 600 മെഗാവാട്ട് അധിക വൈദ്യുതിക്കായി കെ.എസ്.ഇ.ബി വീണ്ടും ടെൻഡർ ക്ഷണിച്ചിരുന്നെങ്കിലും വളരെ കുറഞ്ഞ കമ്പനികൾ മാത്രമാണ് കരാറിൽ പങ്കെടുക്കാൻ മുന്നോട്ടുവന്നത്. ഇത് മാത്രവുമല്ല, ഈ കമ്പനികൾ ആവശ്യപ്പെട്ടതാകട്ടെ ഉയർന്ന നിരക്കുമാണ്. നിലവിൽ ഉയർന്ന തുകയ്ക്കുള്ള ഈ വൈദ്യുതി വാങ്ങൽ കരാറുകൾ സംസ്ഥാന റെഗുലേറ്ററി കമ്മീഷന്റെ അനുമതിക്കായി സമർപ്പിച്ചിരിക്കുകയാണ് ബോർഡ്.
പ്രതിവർഷം ആറുശതമാനം ഉപഭോഗ വർധനവ് കണക്കാക്കിയാണ് സാധാരണയായി കെ.എസ്.ഇ.ബി ദീർഘകാല വൈദ്യുതി വാങ്ങൽ കരാറുകളിൽ ഏർപ്പെടാറുള്ളത്. എന്നാൽ സെപ്റ്റംബർ മാസത്തിൽ മാത്രം സംസ്ഥാനത്തെ വൈദ്യുതി ഉപഭോഗത്തിൽ 18 ശതമാനത്തിന്റെ വൻ വർധനവാണ് രേഖപ്പെടുത്തിയത്. ഒക്ടോബറിലും ഇതേ രീതിയിൽ ഉപയോഗം ഉയർന്നാൽ കാര്യങ്ങൾ ബോർഡിന്റെ കൈവിട്ടുപോകും. തുലാവർഷം ചതിക്കുകയോ ജലാശയങ്ങളിലേക്ക് ആവശ്യത്തിന് വെള്ളമെത്താതിരിക്കുകയോ ചെയ്താൽ രാത്രികാലങ്ങളിൽ ഉൾപ്പെടെ കടുത്ത വൈദ്യുതി നിയന്ത്രണങ്ങൾ അടിച്ചേൽപ്പിക്കാൻ കെ.എസ്.ഇ.ബി നിർബന്ധിതരായേക്കും.
