കാലിഫോർണിയ; ഇന്ത്യൻ പ്രധാനമന്ത്രി നരേന്ദ്രമോദിയുമായി നടത്തിയ വെർച്വൽ കൂടിക്കാഴ്ച അതിഗംഭീരമെന്ന് ഗൂഗിൾ സിഇഒ സുന്ദർ പിച്ചെ. പ്രധാനമന്ത്രിക്ക് അദ്ദേഹം നന്ദി പറഞ്ഞു. ഗൂഗിൾ ഇന്ത്യയിൽ നടത്താനിരിക്കുന്ന ഭാവി പ്രവർത്തനങ്ങളെക്കുറിച്ച് കൂടിക്കാഴ്ചയിൽ ചർച്ച ചെയ്തതായും സുന്ദർ പിച്ചെ പറഞ്ഞു.
ഇന്നലെ രാവിലെ ആയിരുന്നു പ്രധാനമന്ത്രി നരേന്ദ്രമോദി സുന്ദർ പിച്ചെയുമായി വെർച്വൽ കൂടിക്കാഴ്ച നടത്തിയത്. ഇന്ത്യയിലെ പ്രവർത്തനങ്ങൾ വിപുലപ്പെടുത്തുന്നതും ആർട്ടിഫിഷൽ ഇന്റലിജൻസിന്റെ സാദ്ധ്യതകൾ വിനിയോഗിക്കുന്നതും പങ്കാളിത്ത പ്രവർത്തനങ്ങൾ വർദ്ധിപ്പിക്കുന്നതും കൂടിക്കാഴ്ചയിൽ ചർച്ചയായതായി സുന്ദർ പിച്ചെ സമൂഹമാദ്ധ്യമമായ എക്സിൽ പോസ്റ്റ് ചെയ്ത കുറിപ്പിൽ പറഞ്ഞു.
എച്ച്പിയുമായി ചേർന്ന് ഇന്ത്യയിൽ ക്രോംബുക്സ് നിർമിക്കാനുളള ഗൂഗിളിന്റെ പദ്ധതിയെ പ്രധാനമന്ത്രി അഭിനന്ദിച്ചു. കൂടുതൽ ഇന്ത്യൻ ഭാഷകളിൽ എഐ ടൂൾസ് അവതരിപ്പിക്കാനുളള ഗൂഗിളിന്റെ പദ്ധതിയുൾപ്പെടെ ചർച്ചയായിരുന്നു. സദ്ഭരണത്തിന് വേണ്ടി ആർട്ടിഫിഷൽ ഇന്റലിജൻസിന്റെ സാദ്ധ്യതകൾ പ്രയോജനപ്പെടുത്താനുളള ഗൂഗിളിന്റെ പരിശ്രമത്തെയും പ്രധാനമന്ത്രി അഭിനന്ദിച്ചു.
ഗുജറാത്തിലെ ഗാന്ധിനഗറിലുളള അന്താരാഷ്ട്ര ഫിനാൻസ് ടെക് സിറ്റിയിൽ ഗൂഗിളിന്റെ അന്താരാഷ്ട്ര ഫിൻടെക് ഓപ്പറേഷൻസ് സെന്റർ തുറക്കാനുളള തീരുമാനത്തിലും പ്രധാനമന്ത്രി സന്തോഷം പ്രകടിപ്പിച്ചു. ജി പേയുടെയും യുപിഐയുടെയും സാദ്ധ്യതകൾ പ്രയോജനപ്പെടുത്തി ഇന്ത്യയിലെ സാമ്പത്തിക ഉൾച്ചേർക്കൽ കൂടുതൽ വിപുലമാക്കുന്നതിനുളള ഗൂഗിളിന്റെ പദ്ധതിയെക്കുറിച്ചും പിച്ചെ പ്രധാനമന്ത്രിയോട് വിശദീകരിച്ചു.
Discussion about this post