ശ്രീനഗർ: ജമ്മു കശ്മീരിൽ നുഴഞ്ഞു കയറ്റ ശ്രമം പരാജയപ്പെടുത്തി സൈന്യം. പാക് ഭീകരനെ വധിച്ചു. കുപ് വാര ജില്ലയിലെ കെരാൻ സെക്ടറിൽ ആയിരുന്നു സംഭവം.
ജാംഗുണ്ഡ് മേഖലയിലെ നിയന്ത്രണ രേഖ വഴിയായിരുന്നു നുഴഞ്ഞു കയറ്റ ശ്രമം ഉണ്ടായത്. ഈ സമയം പ്രദേശത്ത് പട്രോളിംഗിൽ ഏർപ്പെട്ടിരിക്കുകയായിരുന്നു സുരക്ഷാ സേന. ഇതിനിടെ ഭീകരരുടെ സംശയാസ്പദമായ നീക്കം ശ്രദ്ധയിൽപ്പെടുകയായിരുന്നു. ഇതോടെ ഭീകരരെ പിടികൂടാൻ സുരക്ഷാ സേന ശ്രമിച്ചു. എന്നാൽ ഭീകരർ സുരക്ഷാ സേനയെ ആക്രമിക്കുകയായിരുന്നു. ഇതോടെ ഭീകരർക്ക് നേരെ സുരക്ഷാ സേന വെടിയുതിർത്തു. ഇതിന് ശേഷം നടത്തിയ തിരച്ചിലിലാണ് ഭീകരന്റെ മൃതദേഹം കണ്ടെടുത്തത്.
കൂടുതൽ ഭീകരർക്കായി പ്രദേശത്ത് തിരച്ചിൽ തുടരുകയാണ്. സംഭവത്തിന്റെ പശ്ചാത്തലത്തിൽ മേഖലയിൽ അതീവ ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്. ഇന്നലെ രാത്രി ഭീകരരുടെ ആക്രമണത്തിൽ പോലീസുകാരന് പരിക്കേറ്റിരുന്നു. ഇതിന് പിന്നാലെയാണ് ഭീകരനെ ഏറ്റുമുട്ടലിൽ സുരക്ഷാ സേന വധിച്ചത്.
Discussion about this post