എറണാകുളം: പന്തീരാങ്കാവ് യുഎപിഎ കേസ് പ്രതി അലൻ ഷുഹൈബിനെതിരെ കേസ്. ആത്മഹത്യാശ്രമത്തിനാണ് പോലീസ് കേസ് എടുത്തിരിക്കുന്നത്. നിലവിൽ സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ തന്നെ തുടരുകയാണ് അലൻ.
ഇൻഫോ പാർക്ക് പോലീസാണ് കേസ് എടുത്തത്. ഇന്ന് അലന്റെ മൊഴി രേഖപ്പെടുത്താൻ പോലീസ് ആശുപത്രിയിൽ എത്തും. ഇതിന് ശേഷമാകും തുടർ നടപടികൾ സ്വീകരിക്കുക. 30 ലധികം ഉറക്ക ഗുളികയാണ് ഇയാൾ കഴിച്ചത് എന്നാണ് പോലീസിന്റെ എഫ്ഐആർ.
ഇന്നലെയാണ് അമിത അളവിൽ മയക്കുമരുന്ന് കഴിച്ച് അലൻ ആത്മഹത്യയ്ക്ക് ശ്രമിച്ചത്. ഇതിന് മുൻപായി സുഹൃത്തുക്കൾക്ക് ഫോണിൽ ഇതിന്റെ കാരണം വ്യക്തമാക്കി കുറിപ്പും അയച്ചിരുന്നു. ഇത് കണ്ടതോടെ സുഹൃത്തുക്കൾ അലന്റെ താമസ സ്ഥലത്ത് എത്തുകയായിരുന്നു. അപ്പോഴാണ് അവശനിലയിൽ കണ്ടത്.
അലൻ അപകടനില തരണം ചെയ്തു. ഇന്ന് മുറിയിലേക്ക് മാറ്റിയേക്കുമെന്നാണ് സൂചന.
Discussion about this post