ന്യൂഡൽഹി: കൽക്കരി കൊള്ള കേസുമായി ബന്ധപ്പെട്ട് ബംഗാൾ നിയമമന്ത്രി മൊളോയ് ഘട്ടക്കിന് ഇഡി അയച്ച സമൻസ് റദ്ദാക്കാൻ ആവശ്യപ്പെട്ട് നൽകിയ ഹർജി ഡൽഹി ഹൈക്കോടതി തള്ളി. 12 തവണയാണ് ചോദ്യം ചെയ്യലിന് ഹാജരാകാനായി മന്ത്രിക്ക് ഇഡി നോട്ടീസയച്ചത്. എന്നാൽ, ഒരു തവണയാണ് ഘട്ടക്ക് ഹാജരായത്. ‘ഇത്തരമൊരു സാഹചര്യത്തിൽ, ഹർജി അനുവദിക്കുന്ന കാര്യം പരിഗണിക്കാൻ കഴിയില്ലെന്ന് ജസ്റ്റിസ് സ്വരണ കാന്ത ശർമ്മ പറഞ്ഞു.
എന്നാൽ, 67 കാരനായ മൊളോയ് ഘട്ടക്കിന്റെ പ്രായവും ആരോഗ്യ സ്ഥിതിയും കണക്കിലെടുത്ത് കൊൽക്കത്തയിലെ ഓഫീസിൽ ഹാജരാകേണ്ടതിന് 24 മണിക്കൂർ മുൻപ് തന്നെ അദ്ദേഹത്തിന് നോട്ടീസ് അയക്കണമെന്ന് ഇഡിയോട് കോടതി നിർദ്ദേശിച്ചു. കൊൽക്കത്ത ഓഫീസിൽ ഘട്ടകിനെ ചോദ്യം ചെയ്യുമ്പോൾ മതിയായ സുരക്ഷ ഉറപ്പാക്കുന്നതിനായി കൊൽക്കത്ത പോലീസ് കമ്മീഷണർക്കും ബംഗാൾ ചീഫ് സെക്രട്ടറിക്കും നോട്ടീസ് നൽകണമെന്നും കോടതി ഉത്തരവിട്ടു.
ഈസ്റ്റേൺ കോൾഫീൽഡ് ലിമിറ്റഡിന്റെ പാട്ടമേഖലയിൽ നിന്ന് അനധികൃത ഖനനവും കൽക്കരി മോഷണവും ആരോപിച്ച് ക്രിമിനൽ ഗൂഢാലോചനയ്ക്കും വിശ്വാസവഞ്ചനയ്ക്കും 2020 നവംബറിൽ രജിസ്റ്റർ ചെയ്ത കേസുമായി ബന്ധപ്പെട്ടാണ് ഇഡി സമൻസ്.
Discussion about this post