മുംബൈ; ഡീപ്ഫേക്ക് ഫോട്ടോകൾ ഈയിടെയായി ഇന്റർനെറ്റിൽ സെലിബ്രിറ്റികൾക്ക് ശല്യമായി മാറിയിരിക്കുകയാണ്. ഇത്തരം ഡീപ് ഫേക്ക് ഫോട്ടോകൾ ഉപയോഗിച്ചുളള വ്യാജ അക്കൗണ്ടുകൾക്കെതിരെ തുറന്നുപറഞ്ഞ് രംഗത്തെത്തിയിരിക്കുകയാണ് ക്രിക്കറ്റ് താരം സച്ചിൻ ടെണ്ടുൽക്കറുടെ മകൾ സാറ ടെണ്ടുൽക്കർ.
തന്റെ ഡീപ്ഫേക്ക് ഫോട്ടോകൾ സോഷ്യൽ മീഡിയായ എക്സിൽ പ്രചരിക്കുന്നുണ്ടെന്ന് ഇൻസ്റ്റാഗ്രാം സ്റ്റോറിയിലൂടെ സാറ പറഞ്ഞു. ഇത്തരം ചില ചിത്രങ്ങളും അക്കൗണ്ടുകളും നേരിട്ട് കാണാനിടയായെന്നും സാറ പറയുന്നു.
നമ്മുടെ സന്തോഷങ്ങളും സങ്കടങ്ങളും ദൈനംദിന പ്രവർത്തനങ്ങളും പങ്കിടാനുള്ള ഒരു ഇടമാണ് സോഷ്യൽ മീഡിയ. എന്നാൽ സാങ്കേതികവിദ്യ ദുരുപയോഗം ചെയ്യുന്നത് കാണുമ്പോൾ വളരെയെറെ സങ്കടമുണ്ട്. എന്റെ ഫേക്ക് അക്കൗണ്ടുകൾ ആളുകളുടെ ഇടയിൽ തെറ്റിദ്ധരിപ്പിക്കാനുമുള്ള ഉദ്ദേശ്യത്തോടെയാണ് സൃഷ്ടിച്ചിരിക്കുന്നത്. എനിക്ക് എക്സിൽ അക്കൗണ്ട് ഇല്ല, എക്സ് അത്തരം അക്കൗണ്ടുകൾ പരിശോധിച്ച് സസ്പെൻഡ് ചെയ്യുമെന്ന് പ്രതീക്ഷിക്കുന്നുവെന്ന് സാറ ഇൻസ്റ്റാഗ്രാമിൽ കുറിച്ചു.
സാറയുടെ ഇൻസ്റ്റാഗ്രാം സ്റ്റോറി കാട്ടുതീ പോലെയാണ് സോഷ്യൽ മീഡിയയിൽ പടർന്നത്. നേരത്തെ, ബോളിവുഡ് നടി രശ്മിക മന്ദാനയുടെ ‘ഡീപ്ഫേക്ക് വീഡിയോ’ സോഷ്യൽ മീഡിയയിൽ വലിയ കൊടുങ്കാറ്റ് സൃഷ്ടിച്ചിരുന്നു.
Discussion about this post