കൊല്ലം: ഓയൂരില് നിന്ന് കാണാതായ ആറ് വയസുകാരിക്കായി പോലീസ് അന്വേഷണം ഊര്ജിതമാണെന്ന് മന്ത്രി ജെ ചിഞ്ചുറാണി. രാവിലെ മുഖ്യമന്ത്രിയുമായി വിഷയം ചര്ച്ച ചെയ്തതായും മന്ത്രി കൂട്ടിച്ചേര്ത്തു. രാവിലെ എസ്പിയുമായും റൂറല് എസ്പിയുമായും ബന്ധപ്പെട്ടിരുന്നു. രേഖാചിത്രത്തിലുള്ളത് പ്രതി തന്നെയാണോ എന്നത് സ്ഥിരീകരിക്കാനായിട്ടില്ല. എന്നാൽ, പ്രതികള് കേരളം വിട്ടുപോകാന് സാധ്യതയില്ലെന്നും മന്ത്രി വ്യക്തമാക്കി. എത്രയും പെട്ടന്ന് കുഞ്ഞിനെ കണ്ടെത്തുമെന്നാണ് പ്രതീക്ഷയെന്നും മന്ത്രി കൂട്ടിച്ചേർത്തു.
20 ലധികം സിസിടിവി ദൃശ്യങ്ങൾ പോലീസ് ശേഖരിച്ചിട്ടുണ്ട്. പ്രതികള് സഞ്ചരിച്ചതെന്ന് കരുതുന്ന കാര് കല്ലമ്പലം പിന്നിടുന്ന ദൃശ്യങ്ങളും ലഭിച്ചു. കുഞ്ഞിനെ കടത്തിക്കൊണ്ടു പോകുന്നതിന്റെ ദൃശ്യങ്ങളും പാരിപ്പള്ളിയിലെ കടയിൽ സ്ത്രീക്കൊപ്പം എത്തിയെന്നു സംശയിക്കുന്നയാളുടെ രേഖാചിത്രവും പുറത്ത് വന്നിട്ടുണ്ട്.
അതേസമയം, സംഭവത്തില് പോലീസ് ആസ്ഥാനത്ത് പ്രത്യേക കണ്ട്രോള് റൂം തുറന്നു. കൊല്ലം- തിരുവനന്തപുരം ജില്ലാ അതിര്ത്തി കേന്ദ്രീകരിച്ചാണ് പരിശോധന നടക്കുന്നത്. അധികദൂരം കുട്ടിയുമായി പോകാന് സാധ്യതയില്ലെന്നും ജില്ലയ്ക്കുള്ളില് വ്യാപക പരിശോധന നടത്തുകയാണെന്നും പോലീസ് വ്യക്തമാക്കി.
Discussion about this post