വലിയ വില കൊടുത്തു വാങ്ങിയ കാർ അപകടത്തിൽ പെട്ട സമയത്ത് സുരക്ഷാ സജ്ജീകരണങ്ങൾ ഒന്നും പ്രവർത്തിക്കാതിരുന്നതായി സംരംഭകന്റെ പരാതി. എംജി ഹെക്ടർ കാറിനെതിരെയാണ് സംരംഭകനായ സൗരഭ് ഗാന്ധി പരാതിയുമായി രംഗത്തെത്തിയിട്ടുള്ളത്. സമൂഹമാദ്ധ്യമങ്ങളിൽ അദ്ദേഹം പങ്കുവച്ച പോസ്റ്റ് പ്രകാരം ഇലക്ട്രിക് പോസ്റ്റിലും മതിലിലുമായി കൂട്ടിയിടിച്ച് വാഹനത്തിന് വലിയ രീതിയിലുള്ള തകരാറുകൾ സംഭവിച്ചിട്ടുണ്ട്.
വാഹനത്തിൽ 6 എയർബാഗുകൾ ആണ് ഉള്ളത്. എന്നാൽ അവയിൽ ഒന്നുപോലും അപകട സമയത്ത് പ്രവർത്തിച്ചില്ല എന്നാണ് സൗരഭ് പരാതി ഉന്നയിക്കുന്നത്. കഴിഞ്ഞ ദിവസമാണ് സംരംഭകനായ സൗരഭിന്റെ കാർ അപകടത്തിൽപ്പെട്ടത്. വാഹനത്തിന്റെ മുൻവശത്തിന് വലിയ രീതിയിലുള്ള തകർച്ച തന്നെ ഉണ്ടായിട്ടുണ്ട്. എങ്കിലും യാത്രക്കാർ അത്ഭുതകരമായി തന്നെ രക്ഷപ്പെട്ടു. എന്നാൽ അപകടത്തിൽപ്പെട്ട സമയത്ത് എയർബാഗുകൾ ഒന്നും തന്നെ പ്രവർത്തിച്ചില്ല എന്ന് സൗരഭ് വ്യക്തമാക്കുന്നു.
കാർ സർവീസ് സെന്ററിൽ ഈ പരാതി ഉന്നയിച്ചെങ്കിലും തീർത്തും നിരാശാജനകമായിരുന്നു ലഭിച്ച മറുപടി എന്നാണ് സൗരഭ് വെളിപ്പെടുത്തുന്നത്. എല്ലാ അപകടങ്ങൾക്കും കാറിന്റെ എയർബാഗ് പ്രവർത്തിക്കില്ലെന്നും ചില പ്രത്യേക സ്ഥലങ്ങളിൽ ഇടിക്കുമ്പോൾ മാത്രമാണ് എയർബാഗ് തുറക്കുക എന്നുമാണ് കാർ സർവീസ് സെന്റർ നൽകിയ മറുപടി. ഇത്തരത്തിൽ പ്രവർത്തിക്കാത്ത സുരക്ഷാ സജ്ജീകരണങ്ങൾ വലിയ വില ഈടാക്കാനുള്ള വെറും തന്ത്രം മാത്രമാണെന്നാണ് സൗരഭ് സൂചിപ്പിക്കുന്നത്.
