എറണാകുളം: വീണ്ടും സർവ്വകാല റെക്കോർഡ് ഇട്ട് സ്വർണവില. ഇന്ന് കൂടി വില വർദ്ധിച്ചതോടെ സ്വർണം പവന് 47,000 കടന്നു. നിലവിൽ ഒരു പവൻ സ്വർണത്തിന് 47,080 രൂപയാണ് വിപണി വില.
ഇന്ന് ഗ്രാമിന് 40 രൂപയും പവന് 320 രൂപയുമാണ് വർദ്ധിച്ചത്. ഇതോടെ ഒരു ഗ്രാം സ്വർണത്തിന് 5885 രൂപയായി. ഇന്നലെയും സ്വർണവില വർദ്ധിച്ചിരുന്നു. ഇതോടെ റെക്കോർഡ് വിലയായിരുന്നു ഇന്നലെയും രേഖപ്പെടുത്തിയത്. തുടർച്ചയായ നാലാം ദിവസമാണ് സ്വർണവില വർദ്ധിക്കുന്നത്.
കഴിഞ്ഞ പത്ത് ദിവസത്തെ സ്വർണവില പരിശോധിക്കുമ്പോൾ നവംബർ 30 ന് മാത്രമാണ് വിലയിൽ കുറവ് രേഖപ്പെടുത്തിയിട്ടുള്ളത്. 60 രൂപയായിരുന്നു കുറഞ്ഞത്. എന്നാൽ ഇതേ തുടർന്നുള്ള മുഴുവൻ ദിവസങ്ങളിലും വില വർദ്ധിക്കുകയായിരുന്നു.
അതേസമയം വില വർദ്ധിച്ചെങ്കിലും വ്യാപരത്തിൽ കുറവില്ലെന്നാണ് വ്യാപാരികൾ പറയുന്നത്. വരും ദിവസങ്ങളിൽ വില ഉയർന്നേക്കുമെന്നാണ് ഉപഭോക്താക്കളുടെ ഭയം. ഇതേ തുടർന്ന് സ്വർണം വാങ്ങാൻ ധാരാളം പേർ എത്തുന്നുണ്ട്.
Discussion about this post