പൂർണ്ണ വൃത്തത്തിൽ സൂര്യശോഭ ; ആദിത്യ എൽ1പകർത്തിയ സൂര്യന്റെ പൂർണ്ണവൃത്തത്തിൽ ഉള്ള ആദ്യരൂപം പുറത്തുവിട്ട് ഐഎസ്ആർഒ

ന്യൂഡൽഹി : ആദിത്യ എൽ1 ബഹിരാകാശ പേടകത്തിലെ സോളാർ അൾട്രാവയലറ്റ് ഇമേജിംഗ് ടെലിസ്‌കോപ്പ് ഉപകരണം  (SUIT) സൂര്യന്റെ ആദ്യത്തെ പൂർണ്ണ വൃത്തത്തിലുള്ള  ചിത്രങ്ങൾ വിജയകരമായി പകർത്തിയതായി ഐഎസ്ആർഒ അറിയിച്ചു. അൾട്രാവയലറ്റ് തരംഗദൈർഘ്യത്തിന് സമീപമുള്ള ചിത്രമാണ് പകർത്തിയിരിക്കുന്നത്.

200-400 nm തരംഗദൈർഘ്യ പരിധിയിലുള്ള ചിത്രങ്ങളാണ് SUIT പകർത്തിയിരിക്കുന്നത്. “സൂര്യന്റെ ഫോട്ടോസ്ഫിയറിന്റെയും ക്രോമോസ്ഫിയറിന്റെയും സങ്കീർണ്ണമായ വിശദാംശങ്ങളിലേക്ക് ചിത്രങ്ങൾ പയനിയറിംഗ് ഉൾക്കാഴ്ചകൾ നൽകുന്നു” എന്ന കുറിപ്പോടെയാണ് ഐഎസ്ആർഒ ഔദ്യോഗിക എക്സ് അക്കൗണ്ടിൽ ചിത്രം പങ്കു വച്ചിരിക്കുന്നത്.

ആദിത്യ എൽ-1-ലെ ഏഴ് പേലോഡുകളിലൊന്നാണ് സോളാർ അൾട്രാവയലറ്റ് ഇമേജിംഗ് ടെലിസ്‌കോപ്പ് (SUIT).  സോളാർ ഫോട്ടോസ്ഫിയറിന്റെയും ക്രോമോസ്ഫിയറിന്റെയും അൾട്രാവയലറ്റ് ഇമേജ് പകർത്താനും പ്രകാശ ഊർജത്തിന്റെ വ്യതിയാനം പരിശോധിക്കാനും ഉദ്ദേശിച്ച് നിർമ്മിച്ചിട്ടുള്ളതാണ് ഈ ഉപകരണം.

ഇതിന് മുമ്പ്, ആദിത്യ സോളാർ വിൻഡ് കണികാ പരീക്ഷണത്തിന്റെ (ASPEX) പേലോഡിലെ രണ്ടാമത്തെ ഉപകരണമായ സോളാർ വിൻഡ് അയോൺ സ്പെക്ട്രോമീറ്റർ (SWIS) ഡിസംബർ 2 ന് പ്രവർത്തനം ആരംഭിച്ചതായി ഐഎസ്ആർഒ അറിയിച്ചിരുന്നു.  കഴിഞ്ഞ മാസം സോളാർ ജ്വാലകളുടെ ആദ്യ ഹൈ-എനർജി എക്സ്-റേ ദൃശ്യവും ഐഎസ്ആർഒ പങ്കുവെച്ചു.  സെപ്റ്റംബർ രണ്ടിന് ശ്രീഹരിക്കോട്ടയിലെ സതീഷ് ധവാൻ സ്‌പേസ് സെന്ററിൽ നിന്നാണ് സൂര്യനെ കുറിച്ചുള്ള കൂടുതൽ വിവരങ്ങൾ പഠിക്കുന്നതിനായി ആദിത്യ എൽ-1 വിക്ഷേപിച്ചത്.