കൊച്ചി: പെരുമ്പാവൂരിൽ എൽദോസ് കുന്നപ്പിള്ളിൽ എംഎൽഎയ്ക്ക് മർദ്ദനമേറ്റതായി പരാതി. നവകേരള സദസ്സിനെതിരെ പ്രതിഷേധിച്ചതിന് മർദ്ദനമേറ്റ കെ.എസ്.യു യൂത്ത് കോൺഗ്രസ് പ്രവർത്തകരെ ആശുപത്രിയിൽ സന്ദർശിക്കാനെത്തിയപ്പോഴാണ് മർദ്ദനമേറ്റത്. . ആശുപത്രി മുറ്റത്തുവെച്ചാണ് ഒരു സംഘമാളുകൾ എംഎൽഎയെ കയ്യേറ്റം ചെയ്യുകയും ഡ്രൈവറെ മർദിക്കുകയും ചെയ്തത്. ഡിവൈഎഫ്ഐ പ്രവർത്തകർ മർദ്ദിച്ചെന്നാണ് പരാതി.
പെരുമ്പാവൂർ യൂത്ത് കോൺഗ്രസ് മണ്ഡലം പ്രസിഡന്റ് നോയൽ ജോസിനെ കാണാൻ ആശുപത്രിയിൽ എത്തിയതായിരുന്നു എം എൽ എ. 20 ബൈക്കുകളിലെത്തിയ അറുപതോളം പ്രവർത്തകർ ചേർന്നാണ് എംഎൽഎയെ മർദിച്ചത്. തുടർന്ന് എൽദോസ് കുന്നപ്പള്ളി എംഎൽഎയെ ആശുപത്രിയിൽ പ്രവേശിപ്പിച്ചു.
അതേസമയം നവകേരള സദസിനായി മുഖ്യമന്ത്രിയും മന്ത്രിമാരും സഞ്ചരിക്കുന്ന ബസിന് നേരെ ഷൂ എറിഞ്ഞും കരിങ്കൊടി വീശിയും കെ.എസ്.യു പ്രവർത്തകരുടെ പ്രതിഷേധം. പ്രതിഷേധിച്ച നാല് കെഎസ്യു പ്രവർത്തകരെ പോലീസ് കസ്റ്റഡിയിലെടുത്തു. യോഗവേദിക്ക് സമീപം കരിങ്കൊടി കാണിച്ച യൂത്ത് കോൺഗ്രസ്-കെഎസ്യു പ്രവർത്തകരെ ഡിവൈഎഫ്ഐക്കാർ മർദിച്ചു.
Discussion about this post