റായ്പൂര്:ഗോത്രവര്ഗ ഉന്നമനത്തിനായി പ്രവര്ത്തിക്കുമെന്നും പാര്ട്ടിയുടെ എല്ലാ വാഗ്ദാനങ്ങളും നിറവേറ്റുമെന്നും ഛത്തീസ്ഗഢ് മുഖ്യമന്ത്രി വിഷ്ണു ദേവ് സായ്. എന്നാല് ഗോത്രവര്ഗക്കാരെ വോട്ട് ബാങ്കായി മാത്രമാണ് കോണ്ഗ്രസ് കണക്കാക്കുന്നതെന്നും അദ്ദേഹം പറഞ്ഞു. ബിജെപി എംഎല്എമാരുടെ യോഗം നടന്നതിന് പിന്നാലെയാണ് അദ്ദേഹം നിലപാട് വ്യക്തമാക്കിയത്. തന്റെ സര്ക്കാര് അധികാരത്തിലേറിയ ശേഷം ആദ്യ ഉത്തരവ് പ്രധാനമന്ത്രി ആവാസ് യോജനയില് 18 ലക്ഷം വീടുകള് അനുവദിച്ചുകൊണ്ടുളളതാകുമെന്നും അദ്ദേഹം പറഞ്ഞു.
‘ആദിവാസി സമൂഹത്തെ ബിജെപി എന്നും ബഹുമാനിക്കുന്നു.അവരുടെ ക്ഷേമത്തിനായി പ്രത്യേക മന്ത്രിസഭ രൂപീകരിച്ചതും ബിജെപിയാണ് .ആദിവാസി വിഭാഗത്തില് നിന്നുള്ള ദ്രൗപതി മുര്മു ജി ബിജെപി ഭരണത്തിന് കീഴില് രാഷ്ട്രപതിയായി. അടല് ബിഹാരി വാജ്പേയി സര്ക്കാര് അധികാരത്തിലിരുന്നപ്പോള് പ്രത്യേക ആദിവാസി വികസന മന്ത്രാലയം രൂപീകരിച്ചു’ അദ്ദേഹം കുട്ടിച്ചേര്ത്തു.
ഞായറാഴ്ചയാണ് ബിജെപി കേന്ദ്രനേതൃത്വം ഛത്തീസ്ഗഢ് മുഖ്യമന്ത്രിയായി വിഷ്ണു ദേവ് സായിയെ തിരഞ്ഞെടുത്തത്. തന്നെ ഈ ഉത്തരവാദിത്തം ഏല്പ്പിച്ചതിന് പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, മറ്റ് മുതിര്ന്ന ബിജെപി നേതാക്കള് എന്നിവരോട് അദ്ദേഹം നന്ദി അറിയിച്ചു.നിയമസഭാ തെരഞ്ഞെടുപ്പിന് മുന്നോടിയായി പുറത്തിറക്കിയ ബി.ജെ.പി പ്രകടന പത്രിക ‘മോദി കി ഗ്യാരണ്ടി 2023’ ലെ വാഗ്ദാനങ്ങള് പൂര്ണമായി നിറവേറ്റുമെന്ന് അദ്ദേഹം പറഞ്ഞു.
Discussion about this post