ന്യൂഡൽഹി: പാർലമെന്റ് സുരക്ഷാ വീഴ്ചയുടെ പേരിൽ എട്ട് സുരക്ഷാ ഉദ്യോഗസ്ഥരെ ലോക്‌സഭാ സെക്രട്ടേറിയറ്റ് സസ്പെൻഡ് ചെയ്തു. രാംപാൽ, അരവിന്ദ്, വീർ ദാസ്, ഗണേഷ് അനിൽ, പർദീപ്, വിമിത്, നരേന്ദർ എന്നിവരെയാണ് സസ്പെൻഡ് ചെയ്തിരിക്കുന്നത്.
പാർലമെന്റ് ഭീകരാക്രമണത്തിന്റെ 22-ാം വാർഷികത്തിലാണ് ലോക്സഭയിൽ വൻ സുരക്ഷാവീഴ്ചയുണ്ടായത്. സീറോ അവറിൽ രണ്ട് നുഴഞ്ഞുകയറ്റക്കാർ സന്ദർശക ഗാലറിയിൽ നിന്ന് സഭയുടെ അകത്തളത്തേക്ക് ചാടുകയും സ്‌പീക്കറുടെ കസേരയ്ക്ക് നേരെ പാഞ്ഞടുക്കുകയുമായിരിന്നു. ഇയാളെ എം പി മാർ ചേർന്ന് കീഴടക്കിയെങ്കിലും ചെറിയ സമയത്തിനുള്ളിൽ വൻ പരിഭ്രാന്തി സൃഷ്ടിക്കുവാൻ ഇത് കാരണമായി.
കീഴടക്കുന്നതിനു മുന്നേ തന്നെ അവർ കൈവശം കരുതിയിരുന്ന ക്യാനുകളിൽ നിന്നും മഞ്ഞ വാതകം പുറത്ത് തള്ളുന്നതിൽ അവർ വിജയിച്ചതിനാൽ പാർലമെന്റിൽ വളരെ നാടകീയ രംഗങ്ങളാണ് നടന്നത്.
ലോക്‌സഭാ സെക്രട്ടേറിയറ്റിന്റെ അഭ്യർത്ഥന പ്രകാരം, എംഎച്ച്എ ബുധനാഴ്ച പാർലമെന്റ് സുരക്ഷാ ലംഘന സംഭവത്തെക്കുറിച്ച് അന്വേഷിക്കാൻ ഉത്തരവിടുകയും സെൻട്രൽ റിസർവ് പോലീസ് ഫോഴ്‌സ് ഡയറക്ടർ ജനറൽ അനീഷ് ദയാൽ സിംഗിന്റെ കീഴിൽ മറ്റ് സുരക്ഷാ ഏജൻസികളിലെ അംഗങ്ങളും വിദഗ്ധരുമായി ഒരു അന്വേഷണ സമിതി രൂപീകരിക്കുകയും ചെയ്തു.
എം‌എച്ച്‌എയുടെ അഭിപ്രായത്തിൽ, പാർലമെന്റിന്റെ സുരക്ഷാ ലംഘനത്തിന്റെ കാരണങ്ങളെക്കുറിച്ച് അന്വേഷണ സമിതി അന്വേഷിക്കുകയും വീഴ്ചകൾ കണ്ടെത്തുകയും തുടർനടപടി ശുപാർശ ചെയ്യുകയും ചെയ്യും. പാർലമെന്റിന്റെ സുരക്ഷ മെച്ചപ്പെടുത്തുന്നതിനുള്ള നിർദ്ദേശങ്ങൾ ഉൾപ്പെടെയുള്ള ശുപാർശകൾ അടങ്ങിയ റിപ്പോർട്ട് കമ്മിറ്റി എത്രയും വേഗം സമർപ്പിക്കുമെന്ന് എംഎച്ച്എ അറിയിച്ചു.
Discussion about this post