ന്യൂഡൽഹി : സമൂഹത്തിലെ ഏറ്റവും ദുർബലരായ വിഭാഗങ്ങളെ പെൻഷന്റെ പരിധിയിൽ കൊണ്ടുവരിക എന്ന ലക്ഷ്യത്തോടെ നരേന്ദ്രമോദിയുടെ നേതൃത്വത്തിലുള്ള കേന്ദ്രസർക്കാർ ആരംഭിച്ച അടൽ പെൻഷൻ യോജന പദ്ധതിക്ക് ജനങ്ങൾക്കിടയിൽ ഗംഭീര വരവേൽപ്പ്. അടൽ പെൻഷൻ യോജനയ്ക്ക് (എപിവൈ) കീഴിലുള്ള മൊത്തം വരിക്കാരുടെ എണ്ണം 6 കോടി കവിഞ്ഞു. നടപ്പ് സാമ്പത്തിക വർഷത്തിൽ 79 ലക്ഷത്തിലധികം പേരാണ് ഈ പെൻഷൻ പദ്ധതിയിൽ അംഗങ്ങളായിരിക്കുന്നത്.
സാധാരണക്കാരും സമൂഹത്തിന്റെ താഴേക്കിടയിലുള്ളവരുമായ ഭാരതീയരുടെ വാർദ്ധക്യ വരുമാന സുരക്ഷയ്ക്കായി 2015 മെയ് 9 ന്ആയിരുന്നു അടൽ പെൻഷൻ യോജന പദ്ധതി പ്രഖ്യാപിച്ചത്. ഇന്ത്യൻ ഗവൺമെന്റിന്റെ ഒരു പ്രധാന സാമൂഹിക സുരക്ഷാ പദ്ധതിയാണ് അടൽ പെൻഷൻ യോജന. 60 വയസ് മുതൽ ആജീവനാന്തം പ്രതിമാസ പെൻഷൻ ലഭിക്കുന്നതാണ് ഈ പദ്ധതിയുടെ പ്രത്യേകത. ആയിരം രൂപ മുതൽ 5000 രൂപ വരെയാണ് അടൽ പെൻഷൻ യോജന വഴി പ്രതിമാസ പെൻഷൻ ലഭിക്കുക. ഉപഭോക്താവ് അടയ്ക്കുന്ന പ്രീമിയം തുകകൾ അനുസരിച്ച് ആയിരിക്കും പെൻഷൻ ലഭിക്കുന്നത്. ഇന്ത്യയിലെ എല്ലാ ദേശസാൽകൃത ബാങ്കുകളിലും അടൽ പെൻഷൻ യോജന പദ്ധതി ലഭ്യമാണ്.
Discussion about this post