കോട്ടയം : കോട്ടയം മെഡിക്കൽ കോളേജ് ആശുപത്രിയിൽ നിന്നും കുഞ്ഞിനെ തട്ടിക്കൊണ്ടു പോകാൻ ശ്രമിച്ച പ്രതി പിടിയിൽ. അഞ്ചുമാസം പ്രായമുള്ള കൈക്കുഞ്ഞിനെയാണ് ഇയാൾ തട്ടിക്കൊണ്ടു പോകാനായി ശ്രമിച്ചത്. കോട്ടയം അതിരമ്പുഴ സ്വദേശി അഷ്റഫ് എന്നയാളെയാണ് പോലീസ് അറസ്റ്റ് ചെയ്തിരിക്കുന്നത്.
നിരവധി ക്രിമിനൽ കേസുകളിൽ പ്രതിയാണ് പിടിയിൽ ആയിരിക്കുന്ന അഷ്റഫ്. അമ്മയോടൊപ്പം ഉറങ്ങുകയായിരുന്നു കുഞ്ഞിനെയാണ് ഇയാൾ തട്ടിക്കൊണ്ടു പോകാൻ ശ്രമിച്ചത്. കുഞ്ഞിന്റെ കരച്ചിൽ കേട്ട ഉടനെ അമ്മ എഴുന്നേറ്റതിനാൽ ബഹളം വെച്ച് ഇയാളെ തടയുകയായിരുന്നു. തുടർന്ന് മെഡിക്കൽ കോളേജിൽ ഉണ്ടായിരുന്ന മറ്റുള്ളവരും സുരക്ഷാ ജീവനക്കാരും കൂടി പ്രതിയെ പിടികൂടി പോലീസിൽ ഏൽപ്പിച്ചു.
കുഞ്ഞിന്റെ പിതാവിന് തീപൊള്ളൽ ഏറ്റതിനെ തുടർന്ന് ചികിത്സയ്ക്ക് ആയാണ് യുവതിയും കുഞ്ഞും ആശുപത്രിയിൽ എത്തിയിരുന്നത്. അമ്മ അല്പം മയങ്ങിപ്പോയ സമയം നോക്കി പ്രതി അഷ്റഫ് കുഞ്ഞിനെയും എടുത്ത് കടന്നു കളയാൻ ശ്രമിക്കുകയായിരുന്നു. എന്നാൽ കുഞ്ഞു കരഞ്ഞതോടെ യുവതി എഴുന്നേറ്റതാണ് ഇയാളെ പിടികൂടാൻ കാരണമായത്.
