ഇടുക്കി: എസ്എഫ്ഐ പ്രതിഷേധങ്ങൾ മറികടന്ന് തൊടുപുഴയിലെത്തി വ്യാപാരി വ്യവസായി ഏകോപന സമിതിയുടെ ‘കാരുണ്യം’ പരിപാടിയിൽ പങ്കെടുത്ത് ഗവർണർ ആരിഫ് മുഹമ്മദ് ഖാൻ. ഇതിനു മുൻപ് അഞ്ച് തവണ തനിക്ക് നേരെ വധശ്രമം ഉണ്ടായിട്ടുണ്ട്. അപ്പോഴില്ലാത്ത ഭയം ഇപ്പോഴുമില്ലെന്ന് പരിപാടി ഉദ്ഘാടനം ചെയ്തുകൊണ്ട് അദ്ദേഹം വ്യക്തമാക്കി. 1990ൽ ഇരുമ്പ് ദണ്ഡ് കൊണ്ട് അടിയേറ്റ് തലയ്ക്ക് പരുക്കേറ്റിട്ടുണ്ട്. തന്റെ 35-ാം വയസിൽ തോന്നാത്ത ഭയം ഈ 72-ാം വയസിൽ തോന്നുമോ?. പ്രായം ആയുർദൈർഘ്യത്തിന്റെ ദേശീയ ശരാശരി പിന്നിട്ടു. അധികമായി കിട്ടുന്ന സമയത്താണ് ജീവിക്കുന്നത്. അതുകൊണ്ടു തന്നെ ഒട്ടും ഭയമില്ലെന്നും അദ്ദേഹം കൂട്ടിച്ചേർത്തു.
‘മുൻപ് ഇതിലും വലിയ ഭീഷണികൾ നേരിട്ടുണ്ട്. കേന്ദ്രമന്ത്രിസഭയിൽനിന്നു രാജിവയ്ക്കുമ്പോൾ വെറും 35 വയസ്സ് മാത്രമാണുണ്ടായിരുന്നത്. 1985, 86, 87 കാലഘട്ടങ്ങളിലാണ് യഥാർഥത്തിലുള്ള ഭീഷണി നേരിട്ടത്. അഞ്ച് തവണ എനിക്കു നേരെ വധശ്രമമുണ്ടായി. 1990ൽ നടന്ന ശ്രമം ഒരു പരിധിവരെ വിജയിച്ചു. ഇരുമ്പ് ദണ്ഡ് കൊണ്ട് അടിയേറ്റ് തലയ്ക്ക് പരുക്കേറ്റു. ഇപ്പോൾ ഭീഷണിയുണ്ടോ എന്ന് ചോദിക്കുമ്പോൾ പറയാനുള്ളത്, 35–ാം വയസ്സിൽ തോന്നാത്തത് 72–ാം വയസ്സിൽ തോന്നുമോ എന്നാണ്. എന്റെ പ്രായം ആയുർദൈർഘ്യത്തിന്റെ ദേശീയ ശരാശരി പിന്നിട്ടു. അധികമായി കിട്ടുന്ന സമയത്താണ് ജീവിക്കുന്നത്. അതുകൊണ്ടു തന്നെ ഒട്ടും ഭയമില്ല’- ഗവർണർ വ്യക്തമാക്കി.
തനിക്ക് ഒന്നിനെയും പേടിയില്ലെന്നും പരിപാടിയിൽ പങ്കെടുക്കുക തന്നെ ചെയ്യുമെന്നും നേരത്തെ തന്നെ ഗവർണർ വ്യക്തമാക്കിയിരുന്നു. പരിപാടി കഴിഞ്ഞ ഗവർണർ റോഡിലൂടെ ഇറങ്ങി നടക്കുകയും ജനങ്ങളെ അഭിവാദ്യം ചെയ്യുകയും ചെയ്തു. ഒരു ഭീഷണിയുമുള്ളതായി തോന്നിയിട്ടില്ലെന്നും കോഴിക്കോട്ടെ റോഡിലൂടെ നടക്കുന്നത് പോലെ നിങ്ങള് ആവശ്യപ്പെട്ടാല് കൊച്ചിയില് എവിടെ വേണമെങ്കിലും താൻ വരാമെന്നും ആരിഫ് മുഹമ്മദ് ഖാന് പറഞ്ഞു.
Discussion about this post