ന്യൂഡൽഹി: ടാറ്റ സ്റ്റീൽസ് ചെസ് ചാമ്പ്യൻഷിപ്പിൽ ലോക ചാമ്പ്യൻ ഡിംഗ് ലിറനെ തോൽപ്പിച്ച ഇന്ത്യൻ കൗമാര താരം ആർ പ്രജ്ഞാനന്ദയെ അഭിനന്ദിച്ച് സച്ചിൻ തെണ്ടുൽക്കർ. രാജ്യത്തിനായി അഭിമാന നേട്ടങ്ങൾ സ്വന്തമാക്കാൻ പ്രജ്ഞാനന്ദയ്ക്ക് ഇനിയും സാധിക്കട്ടെയെന്ന് സച്ചിൻ പറഞ്ഞു. വരാനിരിക്കുന്ന വെല്ലുവിളികളും അനായാസം നേരിടാൻ ആശംസകൾ നേരുന്നുവെന്നും അദ്ദേഹം കൂട്ടിച്ചേർത്തു. ട്വിറ്ററിലൂടെയായിരുന്നു സച്ചിന്റെ പ്രതികരണം.
ചെസ് ചാമ്പ്യൻഷിപ്പിലെ പ്രജ്ഞാനന്ദയുടെ വിജയം അത്യപൂർവ്വ നേട്ടമാണെന്ന് സച്ചിൻ പറഞ്ഞു. 18ാം വയസ്സിൽ ചെസിൽ ആധിപത്യം ഉറപ്പിയ്ക്കുക മാത്രമല്ല. മറിച്ച് രാജ്യത്തെ തന്നെ ഏറ്റവും മികച്ച കളിക്കാരിൽ ഒരാൾ ആയിരിക്കുന്നു. വരാനിരിക്കുന്ന വെല്ലുവിളികൾ നേരിടാൻ ആശംസകൾ. അന്താരാഷ്ട്ര മത്സരങ്ങളിൽ വിജയിച്ച് രാജ്യത്തിന്റെ യശസ്സ് ഉയർത്താൻ കഴിയട്ടെയെന്നും അദ്ദേഹം വ്യക്തമാക്കി.
കഴിഞ്ഞ ദിവസം ആയിരുന്നു ടാറ്റ സ്റ്റീൽ ചെസ് ചാമ്പ്യൻഷിപ്പ് മത്സരം.
നെതർലൻഡ്സിലെ വിജ് ആൻ സീയിൽ നടന്ന മത്സരത്തിന്റെ നാലാം റൗണ്ടിൽ ആയിരുന്നു ഡിംഗ് ലിറനെ പ്രജ്ഞാനന്ദ തോൽപ്പിച്ചത്.
