ഇത്തവണ നന്നായി പിരിച്ചോണം; പണപ്പരിവിൽ വീഴ്ച വരുത്തിയതിന് പിന്നാലെ കോൺഗ്രസ് മണ്ഡലം കമ്മറ്റി പിരിച്ചുവിട്ടു; നടപടി റദ്ദാക്കി ഡിസിസി

കോഴിക്കോട്: ജില്ലാ കോൺഗ്രസ് കമ്മിറ്റി ഓഫീസ് നിർമാണ ഫണ്ട് പിരിവിൽ വീഴ്ച വരുത്തിയെന്നാരോപിച്ച് താമരശ്ശേരി മണ്ഡലം കമ്മിറ്റി പിരിച്ചുവിട്ട നടപടി റദ്ദ് ചെയ്തു. കോഴിക്കോട് ഡി.സി.സി പ്രസിഡന്റ് അഡ്വ. കെ പ്രവീൺ കുമാറാണ് ഇക്കാര്യം വ്യക്തമാക്കിയത്. കമ്മിറ്റി പുനഃസ്ഥാപിച്ചതായും അവശേഷിക്കുന്ന ഫണ്ട് പിരിച്ചെടുക്കാൻ ഫെബ്രുവരി 15 വരെ സമയം അനുവദിച്ചതായുമാണ് വിവരം.

കഴിഞ്ഞ ആഴ്ചയാണ് സംഭവങ്ങളുടെ തുടക്കം. ഫണ്ട് ഏറ്റുവാങ്ങുന്നതിനായി ഡി.സി.സി പ്രസിഡന്റും സംഘവും മണ്ഡലം കമ്മിറ്റി ഓഫീസിൽ എത്തിയിരുന്നു. 3.6 ലക്ഷം ക്വാട്ടയായി നൽകിയതിൽ 1.3 ലക്ഷം രൂപ മാത്രമാണ് കമ്മിറ്റി സമാഹരിച്ചത്. ഡി.സി.സി പ്രസിഡന്റ് കാര്യമായൊന്നും സംസാരിക്കാതെ മടങ്ങി.

പിന്നാലെ വ്യക്തിപരമായ കാരണങ്ങളാൽ താൻ സ്ഥാനം രാജിവെക്കുകയാണെന്ന് കാണിച്ച് മണ്ഡലം കമ്മിറ്റി പ്രസിഡന്റായി എം.സി നസീമുദ്ദീൻ വാട്‌സ് ആപ്പ് മുഖേന ഡി.സി.സി പ്രസിഡന്റിന് രാജി കൈമാറി. തുടർന്ന് ഫണ്ട് സമാഹരിക്കുന്നതിൽ കാണിച്ച അലംബാവം കണക്കിലെടുത്ത് എം.സി നസീമുദ്ദീൻ പ്രസിഡന്റായ മണ്ഡലം കമ്മിറ്റി പിരിച്ചുവിട്ടതായി ഡി.സി.സി പ്രസിഡന്റ് അറിയിക്കുകയായിരുന്നു.