ആഗ്ര: വിവാഹമോചനത്തിന് പലതരം കാരണങ്ങൾ ദമ്പതികൾ ഉന്നയിക്കാറുണ്ട്. ഇവയിൽ പലതും വാർത്താ ശ്രദ്ധ നേടുന്നതും നാം കാണാറുണ്ട്. വിവാഹമോചനത്തിന് ഉന്നയിച്ച അത്തരമൊരു കാരണമാണ് ഇപ്പോൾ ശ്രദ്ധ നേടിയിരിക്കുന്നത്. ആഗ്രയിലുള്ള ദമ്പതികളുടെ വിവാഹമോചന വാർത്തയാണ് വൈറലായിരിക്കുന്നത്.
ഭർത്താവാണ് വിവാഹമോചനം ആവശ്യപ്പെട്ടിരിക്കുന്നത്. ഭാര്യയ്ക്ക് രാഷ്ട്രീയത്തിൽ വല്ലാത്ത താത്പര്യമാണെന്നും അവർ സജീവമായി രാഷ്ട്രീയത്തിൽ ഇടപെടുന്നു എന്നതുമാണ് ഭർത്താവിന്റെ പ്രശ്‌നം. നഗരത്തിൽ ഭാര്യയ്ക്ക് വലിയതോതിലുള്ള പ്രശസ്തിയുണ്ട്. നഗരത്തിലാകെ ഭാര്യയുടെ പോസ്റ്ററുകൾ പതിപ്പിച്ചിട്ടുണ്ട്. ഇതെല്ലാം ഭർത്താവിനെ അസ്വസ്തനാക്കുന്നു. ഭാര്യ അപരിചിതരോട് മിണ്ടുന്നതോ അപരിചതരെ കാണുന്നതോ പോലും ഭർത്താവിന് ഇഷ്ടമല്ല. ഈ കാരണങ്ങൾ ചൂണ്ടിക്കാട്ടിയാണ് വിവാഹ മോചനം വേണമെന്ന് ഭർത്താവ് ആവശ്യപ്പെട്ടിരിക്കുന്നത്.
രണ്ട് വർഷങ്ങൾക്ക് മുൻപാണ് ഇരുവരുടെയും വിവാഹം കഴിഞ്ഞത്. ഭർത്താവ് സിക്കന്ദ്ര നിവാസിയും ഭാര്യ ന്യൂ ആഗ്രയിലെ താനെ സ്വദേശിയുമാണ്. ഇവർക്ക് ഒരു കുട്ടിയുമുണ്ട്. ഭാര്യ സാമൂഹിക പ്രവർത്തനങ്ങളിലും രാഷ്ട്രീയ മേഖലയിലും സജീവമാണെന്നത് മാത്രമാണ് ഭർത്താവിന്റെ ഏക പ്രശ്‌നം. എന്നാൽ, ഈ മേഖലകളിൽ നിന്നും വിട്ട് നിൽക്കാൻ ഭാര്യക്ക് താൽപ്പര്യമില്ല.
