ഇന്ത്യയുമായുള്ള തർക്കങ്ങൾക്ക് ശാശ്വതമായ പരിഹാരം കാണേണ്ടതിന്റെ ആവശ്യകത ഊന്നിപ്പറഞ്ഞ് മുതിർന്ന പാകിസ്ഥാൻ പ്രതിരോധ വിദഗ്ധൻ രംഗത്ത്. തർക്കങ്ങളുടെ മൂലകാരണങ്ങൾ പരിഹരിക്കാതെ ഒരു പ്രതിസന്ധി അവസാനിപ്പിക്കുന്നത് അതിനേക്കാൾ അപകടകരമായ മറ്റൊരു ഏറ്റുമുട്ടലിന് വഴിതുറക്കുക മാത്രമേ ചെയ്യുകയുള്ളൂവെന്ന് മുൻ ജോയിന്റ് ചീഫ്സ് ഓഫ് സ്റ്റാഫ് കമ്മിറ്റി ചെയർമാൻ ജനറൽ (റിട്ട.) സുബൈർ മഹ്മൂദ് ഹയാത്ത് മുന്നറിയിപ്പ് നൽകി. ഇസ്ലാമാബാദ് ആസ്ഥാനമായി പ്രവർത്തിക്കുന്ന സ്ട്രാറ്റജിക് വിഷൻ ഇൻസ്റ്റിറ്റ്യൂട്ട് സംഘടിപ്പിച്ച പരിപാടിയിലാണ് അദ്ദേഹം ഇക്കാര്യം വ്യക്തമാക്കിയത്. മേഖലയിൽ ശാശ്വത സമാധാനം കൈവരിക്കുന്നതിന് കാശ്മീർ വിഷയത്തിലുള്ള പരിഹാരവും സിന്ധു നദീജല കരാറിന്റെ പുനഃസ്ഥാപനവും അത്യന്താപേക്ഷിതമാണെന്ന് ഇൻസ്റ്റിറ്റ്യൂട്ട് പുറത്തിറക്കിയ പ്രസ്താവനയിൽ പറയുന്നു.
ഇന്ത്യയും പാകിസ്ഥാനും തമ്മിലുണ്ടായ സമീപകാല സംഘർഷങ്ങളെ പരാമർശിച്ച അദ്ദേഹം, ഭാവിയിലെ ഏറ്റുമുട്ടലുകൾ തടയാൻ പ്രതിരോധ തന്ത്രങ്ങളെ (Deterrence) മാത്രം ആശ്രയിക്കുന്നതിന് പരിധികളുണ്ടെന്ന് ഈ സംഭവങ്ങൾ വ്യക്തമാക്കുന്നതായി ചൂണ്ടിക്കാട്ടി. ആണവായുധങ്ങളുള്ള രണ്ട് അയൽരാജ്യങ്ങൾ തമ്മിലുള്ള സംഘർഷങ്ങൾ പതിവാക്കാനാകില്ലെന്നും യുദ്ധത്തിന് സുരക്ഷിതമായ ഇടങ്ങളൊന്നുമില്ലെന്നതുമാണ് ഇതിൽ നിന്ന് പഠിക്കേണ്ട വലിയ പാഠമെന്നും അദ്ദേഹം കൂട്ടിച്ചേർത്തു. ഭാവിയിലുണ്ടാകുന്ന ഏതൊരു പ്രതിസന്ധിയും പുതിയ സാങ്കേതികവിദ്യകൾ, വ്യത്യസ്ത രാഷ്ട്രീയ നേതൃത്വങ്ങൾ, അടിയന്തരമായി തീരുമാനങ്ങൾ എടുക്കേണ്ടിവരുന്ന ചുരുങ്ങിയ സമയപരിധി എന്നിവയാൽ കൂടുതൽ സങ്കീർണ്ണമാകാൻ സാധ്യതയുണ്ട്. ഇത് തെറ്റിദ്ധാരണകൾക്കും അപ്രതീക്ഷിതമായ യുദ്ധസാഹചര്യങ്ങൾക്കും വഴിതെളിച്ചേക്കാം.
ഏകോപിതമായ പ്രാദേശിക സുരക്ഷാ ചട്ടക്കൂട്, ഫലപ്രദമായ പ്രതിസന്ധി പരിഹാര സംവിധാനങ്ങൾ, തുടർച്ചയായ രാഷ്ട്രീയ ചർച്ചകൾ എന്നിവയുടെ അഭാവമാണ് ദക്ഷിണേഷ്യയിൽ ശാശ്വതമായ സമാധാനം നിലനിൽക്കാത്തതിന് കാരണം. കടുത്ത വിപത്തുകളെ തടയുന്ന പ്രതിരോധ സംവിധാനങ്ങൾക്കും വീണ്ടും അപകടങ്ങൾ സൃഷ്ടിക്കുന്ന തർക്കങ്ങൾക്കും ഇടയിലാണ് ഈ മേഖല നിലനിൽക്കുന്നതെന്നും അദ്ദേഹം അഭിപ്രായപ്പെട്ടു. തെളിവുകളില്ലാത്ത ആരോപണങ്ങൾ ഗവൺമെന്റുകൾ വസ്തുതകൾ കണ്ടെത്തുന്നതിന് മുൻപ് തന്നെ വലിയൊരു യുദ്ധത്തിലേക്ക് നയിച്ചേക്കാം. ഭാവിയിൽ ഒരു സംഘർഷം ഉടലെടുക്കുന്നത് ഒരു രാജ്യത്തിന്റെ മനഃപൂർവമായ തീരുമാനത്തേക്കാൾ പെട്ടെന്നുണ്ടാകുന്ന അപകടങ്ങൾ മൂലമാകാൻ സാധ്യതയേറെയാണെന്നും സുബൈർ മുന്നറിയിപ്പ് നൽകി.
