ന്യൂഡൽഹി: ഡൽഹി അന്താരാഷ്ട്ര വിമാനത്താവളത്തിൽ വിമാനം റൺവേ തെറ്റിയിറങ്ങി. അമൃത്സറിൽ നിന്നുള്ള ഇൻഡിഗോ വിമാനമാണ് റൺവേ തെറ്റിയിറങ്ങിയത്. വിമാനം ഡൽഹിയിൽ ഇറങ്ങിയതിന് ശേഷം ടാക്സി വേയിലേക്കുള്ള റൂട്ട് നഷ്ടപ്പെടുകയായിരുന്നു.
റൺവേയിൽ തടസം നേരിട്ടതിനെ തുടർന്ന് വിമാന സർവീസുകൾ വൈകി. 15 മിനിറ്റുകൾക്ക് ശേഷമാണ് റൺവേയിലുുള്ള തടസം നീക്കിയത്. സംഭവത്തിൽ ഇൻഡിഗോ ഇതുവരെ പ്രതികരിച്ചിട്ടില്ല.
ജനുവരി 31ന് ഇൻഡിഗോ ജാർഖണ്ഡിലെ ദിയോഘറിലേക്കുള്ള വിമാനം റദ്ദാക്കിയതിനെ തുടർന്ന് യാത്രക്കാർ വലിയ രീതിയിൽ പ്രതിഷേധിച്ചിരുന്നു. ഇൻഡിഗോ കള്ളൻമാരാണ് എന്നുൾപ്പെടെയുള്ള മുദ്രാവാക്യങ്ങൾ വിളിച്ചുകൊണ്ട് നടന്ന പ്രതിഷേധം വലി സംഘർഷങ്ങൾക്ക് വഴിവച്ചിരുന്നു. കഴിഞ്ഞ മാസം ഡൽഹിയിലേക്കുള്ള വിമാനത്തിൽ നിന്നും ഭക്ഷ്യവിഷബാധയേറ്റതിനെ തുടർന്ന് ക്രിക്കറ്റ് താരം മായങ്ക് അഗർവാളിനെ ആശുപത്രിയിൽ പ്രവേശിപ്പിച്ചിരുന്നു. ഇതേ തുടർന്ന് താരം പോലീസിൽ പരാതി നൽകിയിരുന്നു. കഴിഞ്ഞ മാസം ഡൽഹിയിൽ നിന്നും ബാക്കുവിലേക്കുള്ള ഇൻഡിഗോ വിമാനത്തിലെ പൈലറ്റുമാരെ ജോലിയിൽ നിന്നും നീക്കം ചെയ്തിരുന്നു.
