ചണ്ഡീഗഡ് : ഇന്ത്യയിൽ ബിജെപിക്ക് ഭയമുള്ള ഒരേയൊരു പാർട്ടിയേ ഉള്ളൂവെന്ന് ഡൽഹി മുഖ്യമന്ത്രി അരവിന്ദ് കെജ്രിവാൾ. അത് ആം ആദ്മി പാർട്ടിയാണ് എന്നും കെജ്രിവാൾ വ്യക്തമാക്കി. ലോക്സഭാ തിരഞ്ഞെടുപ്പിൽ ഡൽഹിയിലെ 7 സീറ്റുകളും ആം ആദ്മി പാർട്ടിക്ക് നൽകാൻ വേണ്ടി ഡൽഹി ജനത കാത്തിരിക്കുകയാണെന്നും അരവിന്ദ് കെജ്രിവാൾ അഭിപ്രായപ്പെട്ടു.
പഞ്ചാബിലെ ഗദൂർ സാഹിബ് ലോക്സഭാ മണ്ഡലത്തിൽ നടന്ന പൊതുസമ്മേളനത്തിൽ സംസാരിക്കുകയായിരുന്നു അരവിന്ദ് കെജ്രിവാൾ. ആം ആദ്മി പാർട്ടിയുടെ വിജയം തടയാൻ ആർക്കും കഴിയില്ല. അക്കാര്യം ബിജെപിക്ക് നന്നായി അറിയാം എന്നും കെജ്രിവാൾ സൂചിപ്പിച്ചു. ആം ആദ്മി പാർട്ടി അധികാരത്തിൽ വരുമ്പോൾ ജനങ്ങളുടെ എല്ലാ ആഗ്രഹങ്ങളും സഫലമാകും എന്നും കെജ്രിവാൾ അഭിപ്രായപ്പെട്ടു.
പഞ്ചാബിലെ ജനങ്ങൾ 13 ലോകസഭാ സീറ്റുകളും ആം ആദ്മി പാർട്ടിക്ക് തന്നെ നൽകും. 75 വർഷത്തിനിടെ ആദ്യമായി പഞ്ചാബിൽ ഒരു സ്വകാര്യ പവർ പ്ലാന്റ് വാങ്ങിയത് ആം ആദ്മി പാർട്ടിയാണ്. പഞ്ചാബിലെ റേഷൻ മാഫിയയെ ഇല്ലാതാക്കാനുള്ള പ്രവർത്തനങ്ങളാണ് ഇപ്പോൾ ആം ആദ്മി പാർട്ടി നടത്തുന്നത്. അതിനാൽ തന്നെ ആം ആദ്മി പാർട്ടി അധികാരത്തിൽ വന്നാൽ നിങ്ങളുടെ എല്ലാ ആഗ്രഹങ്ങളും സഫലമാകും എന്നും അരവിന്ദ് കെജ്രിവാൾ വ്യക്തമാക്കി.
Discussion about this post