വെന്തുരുകി കേരളം ; ഒൻപത് ജില്ലകളിൽ ഇന്നും നാളെയും യെല്ലോ അലർട്ട് ; വരും ദിവസങ്ങളിലും ചൂട് കൂടും

തിരുവനന്തപുരം: സംസ്ഥാനത്ത് താപനില ക്രമാതീതമായി ഉയരുന്നു. ഇന്നും നാളെയും ഒൻപത് ജില്ലകളിൽ താപനില കുതിച്ചുയരാനുള്ള സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.  കൊല്ലം , ആലപ്പുഴ , പാലക്കാട് , തിരുവനന്തപുരം , കോട്ടയം, തൃശ്ശൂർ, കോഴിക്കോട് , കണ്ണൂർ , എന്നീ ജില്ലകളിലാണ് യെല്ലോ അലർട്ട് പ്രഖ്യാപിച്ചിരിക്കുന്നത്.

കൊല്ലം, ആലപ്പുഴ, പാലക്കാട്, 37 ഡിഗ്രി സെൽഷ്യസ് വരെയും തിരുവനന്തപുരം, കോട്ടയം, എറണാകുളം, തൃശൂർ, കോഴിക്കോട്, കണ്ണൂർ എന്നീ ജില്ലകളിൽ ഉയർന്ന താപനില 36 ഡിഗ്രി സെൽഷ്യസ് വരെയും ഉയരനാണ് സാധ്യത . സാധാരണയെക്കാൾ 2 മുതൽ 4 നാല് ഡിഗ്രി സെൽഷ്യസ് താപനില വർദ്ധിച്ചേക്കാം. വരും ദിവസങ്ങളിലും താപനില ഉയരുമെന്നും ജനങ്ങൾ ജാഗ്രത പാലിക്കണമെന്നും കാലാവസ്ഥാ നിരീക്ഷണ വകുപ്പ് അറിയിച്ചു.

രാവിലെ 11 മണി മുതൽ 3 മണി വരെയുള്ള സമയങ്ങളിൽ സൂര്യാഘാതം ഏൽക്കാനുള്ള സാധ്യത കൂടുതലാണ്. അതിനാൽ പുറത്ത് ജോലിക്ക് പോകുന്നവരും കുട്ടികളും ശ്രദ്ധിക്കണമെന്ന് മുന്നറിയിപ്പിൽ പറയുന്നു. പരമാവധി ശുദ്ധജലം കുടിച്ച് നിർജ്ജലീകരണം തടയണമെന്നും ദുരന്തനിവാരണ അതോറിറ്റി അറിയിച്ചു.