തിരുവനന്തപുരം: വർക്കലയിൽ ഹോട്ടലിൽ നിന്നും ഭക്ഷണം കഴിച്ചവർക്ക് ഭക്ഷ്യവിഷബാധ. വിവിധ ആശുപത്രികളിലായി 21 പേർ ചികിത്സ തേടി. ടെമ്പിൾ റോഡിലെ സ്പൈസി ഹോട്ടലിൽ നിന്ന് ഭക്ഷണം കഴിച്ചവർക്കാണ് ഭക്ഷ്യവിഷബാധയേറ്റത്. ആരുടെയും നില ഗുരുതരമല്ല.
ഇന്നലെ രാത്രി ഇവിടെ നിന്നും അൽഫാമും കുഴിമന്തിയും കഴിച്ചവർക്കാണ് ശാരീരിക ആസ്വാസ്ഥ്യം ഉണ്ടായത്. കുട്ടികൾ ഉൾപ്പെടെ ഇവിടെ നിന്നും ആഹാരം കഴിച്ചിരുന്നു. ഇതിന് പിന്നാലെ ഇവർക്ക് വയറിളക്കം ഉൾപ്പെടെയുള്ള ആരോഗ്യപ്രശ്‌നങ്ങൾ അനുഭവപ്പെടുകയായിരുന്നു. തുടർന്ന് ആശുപത്രിയിൽ ചികിത്സ തേടി. താലൂക്ക് ആശുപത്രിയിലും പ്രദേശത്തെ സ്വകാര്യ ആശുപത്രിയിലും ആയിരുന്നു ആളുകൾ ചികിത്സ തേടിയിരുന്നത്. താലൂക്ക് ആശുപത്രിയിൽ പ്രവേശിപ്പിച്ചവരെ പിന്നീട് സ്വകാര്യ ആശുപത്രിയിലേക്ക് മാറ്റുകയായിരുന്നു.
അതേസമയം സംഭവത്തെ തുടർന്ന് നഗരസഭ ആരോഗ്യ വിഭാഗം ഹോട്ടലിൽ പരിശോധന നടത്തി. ഹോട്ടലിൽ നിന്നും പഴകിയ ഭക്ഷ്യവസ്തുക്കൾ പിടിച്ചെടുത്തുവെന്നാണ് വിവരം. ഇതേ തുടർന്ന് ഹോട്ടൽ അടച്ചുപൂട്ടി.
Discussion about this post