ന്യൂഡൽഹി: ബിജെപിയുടെ പാർട്ടി ഫണ്ടിലേക്ക് സംഭാവന നൽകി പ്രധാനമന്ത്രി നരേന്ദ്ര മോദി. രണ്ടായിരം രൂപയാണ് അദ്ദേഹം സംഭാവനയായി പാർട്ടി ഫണ്ടിലേക്ക് കൈമാറിയത്. ഏവരും രാഷ്ട്ര നിർമ്മിതിയ്ക്കായി സംഭാവനകൾ നൽകി സഹായിക്കണമെന്ന് പ്രധാനമന്ത്രി പറഞ്ഞു.
നിലവിൽ ബിജെപിയുടെ ഡൊണേഷൻ ക്യാമ്പെയിനിന് തുടക്കമായിട്ടുണ്ട്. ഇതിന് പിന്നാലെയാണ് പ്രധാനമന്ത്രി സംഭാവന ചെയ്തത്. എക്സിലൂടെയാണ് പ്രധാനമന്ത്രി സംഭാവന നൽകിയ കാര്യം അറിയിച്ചത്. വികസിത ഭാരതമെന്ന ലക്ഷ്യത്തിനായി ബിജെപിയുടെ പാർട്ടി ഫണ്ടിലേക്ക് സംഭാവന നൽകിയതിൽ സന്തോഷമുണ്ട്. എല്ലാവരും പാർട്ടിയ്ക്ക് നമോ ആപ്പിലൂടെ സംഭാവന നൽകി രാഷ്ട്ര നിർമ്മാണത്തിൽ പങ്കാളികളാകണമെന്നും അദ്ദേഹം കൂട്ടിച്ചേർത്തു.
ലോക്സഭാ തിരഞ്ഞെടുപ്പ് അടുത്തിരിക്കെ ഈ മാസം ഒന്നിന് ബിജെപി ദേശീയ അദ്ധ്യക്ഷൻ ജെ.പി നദ്ദയായിരുന്നു ഡൊണേഷൻ ക്യാമ്പെയ്നിന് തുടക്കം കുറിച്ചത്. ആയിരം രൂപയായിരുന്നു അദ്ദേഹം സംഭാവന ചെയ്തത്. വരും ദിവസങ്ങളിൽ മറ്റ് നേതാക്കളും പാർട്ടി ഫണ്ടിലേക്ക് സംഭാവന ചെയ്യും.
കഴിഞ്ഞ സാമ്പത്തിക വർഷം 719 കോടി രൂപയാണ് ബിജെപിയുടെ ഫണ്ടിലേക്ക് സംഭാവനയായി ലഭിച്ചത്. മുൻവർഷം 614 രൂപയും ലഭിച്ചിരുന്നു.
