ഇന്ത്യയിലും വിദേശത്തും ഒരുപോലെ ആരാധകരുള്ള സംവിധായകനാണ് എസ് എസ് രാജമൗലി. ബാഹുബലിയിലൂടെ രാജ്യത്തെ ഒന്നാം നിര സംവിധായകനായി ഉയർന്ന രാജമൗലിയുടെ ആർആർആറും വൻ ഹിറ്റായതോടെ ലോകസിനിമാരംഗത്തെ മുൻനിര പ്രതിഭകളിലൊരാളായി സംവിധായകൻ മാറി. ഒരിക്കൽ ദി ന്യൂ യോർക്കർ എന്ന വിദേശ മാദ്ധ്യമത്തിന് നൽകിയ അഭിമുഖത്തിൽ അമേരിക്കക്കാർ കണ്ടിരിക്കേണ്ട മികച്ച അഞ്ച് ഇന്ത്യൻ സിനിമകളെക്കുറിച്ച് രാജമൗലി മനസ്സു തുറന്നിരുന്നു. എന്നാൽ ഈ ലിസ്റ്റിൽ ഒന്നുപോലും ഇദ്ദേഹത്തിന്റെ ചിത്രങ്ങൾ ഇല്ല എന്നത് വലിയ ആശ്ചര്യം ഉണ്ടാക്കിയ കാര്യമാണ്.
1980 ഇറങ്ങിയ ശങ്കരാഭരണം ആണ് ആദ്യ ചിത്രം. കെ വിശ്വനാഥ് സംവിധാനം ചെയ്ത ഈ ചിത്രം തെലുങ്ക് സിനിമാചരിത്രത്തിൽ വലിയ സ്ഥാനം ലഭിച്ച ചിത്രങ്ങളിൽ ഒന്നാണ്. ഒരു മികച്ച മ്യൂസിക്കൽ ഡ്രാമയായിരുന്നു ഈ സിനിമ. ചിത്രത്തിന്റെ സംവിധായകനായ കെ. വിശ്വനാഥനെ ക്ലാസിക് സിനിമകളുടെ തമ്പുരാക്കന്മാരുടെ പട്ടികയിലേക്ക് ഉയർത്തിയത് ശങ്കരാഭരണമായിരുന്നു. സംഗീതത്തിന് ഏറെ പ്രാധാന്യമുള്ള ചലച്ചിത്രത്തിന് 1980 ലെ ഏറ്റവും മികച്ച ചലച്ചിത്രത്തിനുള്ള സ്വർണ കമലം ലഭിക്കുകയുണ്ടായി. ഫൂലൻ ദേവിയുടെ ജീവിത കഥ പറഞ്ഞ ബന്റിറ്റ് ക്വീൻ എന്ന ചിത്രമാണ് അടുത്തത്. ശേഖർ കപൂർ സംവിധാനം ചെയ്ത ചിത്രത്തിൽ ടൈറ്റിൽ റോളിൽ വന്നത് സീമ ബിസ്വാസ് ആണ്. ഇന്ത്യയിൽ നിന്നും ഓസ്‌കാർ എൻട്രിയായി 1994ൽ പോയത് ഈ ചിത്രമായിരുന്നു. ഫൂലന്റെ ജീവിതകഥയെ അടിസ്ഥാനമാക്കി മാലാ സെൻ രചിച്ച ഇന്ത്യാസ് ബാൻഡിറ്റ് ക്വീൻ: ദി ട്രൂ സ്‌റോറി ഓഫ് ഫൂലൻ ദേവി എന്ന പുസ്തകമാണ് ചിത്രത്തിന്റെ ആധാരം.
രാജമൗലിയുടെ ലിസ്റ്റിൽ അടുത്ത ചിത്രം എന്നത് 2003 ൽ ഇറങ്ങിയ ബോളിവുഡ് കോമഡി ചിത്രമായ മുന്ന ഭായി എംബിബിഎസ് ആണ്. രാജ്കുമാർ ഹിറാനി ഒരുക്കിയ ചിത്രത്തിൽ സഞ്ജയ് ദത്തായിരുന്നു മുഖ്യ വേഷത്തിൽ അഭിനയിച്ചത്. ഇന്ത്യയിലെ പല ഭാഷകളിലേക്കും ചിത്രം റീമേക്ക് ചെയ്തിട്ടുണ്ട് . അനുരാഗ് കശ്യപ് 2004ൽ സംവിധാനം ചെയ്ത ചിത്രമാണ് ബ്ലാക്ക് ഫ്രൈഡേ. 1993 ലെ ബോംബെ സ്‌ഫോടന പരമ്പരയുടെ പശ്ചാത്തലത്തിൽ കഥപറഞ്ഞ ചിത്രമാണ് രാജാമൗലി ലിസ്റ്റ് ചെയ്ത മറ്റൊരു സിനിമ. അനുരാഗ് കശ്യപിന്റെ സംവിധാനം തന്നെയാണ് ഈ സിനിമയുടെ പ്രധാന ആകർഷണം.
വെട്രിമാരൻ-ധനുഷ് കോമ്പിനേഷനിൽ വന്ന സൂപ്പർ ഹിറ്റ് ചിത്രമായിരുന്നു ആടുകളം. തമിഴ് സിനിമയുടെ ഗതിമറ്റിയ ഈ ചിത്രം നിരവധി നാഷ്ണൽ അവാർഡുകൾ നേടിയിട്ടുണ്ട്. കഥകൊണ്ടും അഭിനയം കൊണ്ടും മേക്കിങ്ങ് കൊണ്ടും വ്യത്യസ്തമായിരുന്ന ഒരു ചിത്രമാണ് ആടുകളം. അഞ്ച് സിനിമ ശുപാർശകൾ കൂടാതെ, ”എസ്എസ് രാജമൗലി എന്ന് വിളിക്കുന്ന ആരോ സംവിധാനം ചെയ്ത ”ഈഗ” കാണാൻ മറക്കരുതെന്നും അദ്ദേഹം കൂട്ടിച്ചേർത്തു.
അതേസമയം രാജമൗലി കൽക്കി 2898 എഡി എന്ന ചിത്രത്തിൽ പ്രധാനപ്പെട്ട ഒരു വേഷത്തിൽ എത്താൻ പോകുന്നു എന്നാണ് ടോളിവുഡ് ഡോട് കോം റിപ്പോർട്ട് ചെയ്യുന്നത്. വേദ വ്യാസ് എന്ന കഥാപാത്രമായിട്ടായിരിക്കും ചിത്രത്തിൽ എസ് എസ് രാജമൗലി ഉണ്ടാകുക എന്നും റിപ്പോർട്ടിലുണ്ട് . കൽക്കി 2898 എഡിയിൽ നായക കഥാപാത്രമാകുന്നത് പ്രഭാസാണ്. വിഎഫ്എക്‌സ് ഗ്രാഫിക്‌സ് ജോലികൾ പുരോഗമിക്കുകയാണ്. ദേശീയതലത്തിൽ അംഗീകരിക്കപ്പെട്ട പ്രശസ്ത തെലുങ്ക് സംവിധായകൻ നാഗ് അശ്വിൻ ഒരുക്കുന്നതാണ് ഈ ചിത്രം.
Discussion about this post