തിരുവനന്തപുരം : ഇന്ത്യയിൽ തന്നെ ആദ്യമായി ഒരു സർക്കാർ വക ഒടിടി പ്ലാറ്റ്ഫോം ഒരുങ്ങുകയാണ്. കേരള സർക്കാർ അവതരിപ്പിക്കുന്ന സി സ്‌പേസ് ഒടിടി ആണ് ഈ നേട്ടം സ്വന്തമാക്കുന്നത്. സി സ്‌പേസ് ഒടിടിയുടെ ലോഞ്ചിംഗ് ഉടൻ തന്നെ ഉണ്ടാവുന്നതാണ്. ആദ്യഘട്ടത്തിൽ 42 ഓളം ചിത്രങ്ങളാണ് സി സ്‌പേസ് ഒടിടിയിൽ സ്ട്രീമിംഗ് ചെയ്യുക.
2024 മാർച്ച് ഏഴിന് തിരുവനന്തപുരം കൈരളി തീയേറ്ററിൽ വച്ച് നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ സി സ്‌പേസ് ഒടിടിയുടെ ഉദ്ഘാടനം നിർവഹിക്കും. സംസ്ഥാന അവാർഡ് നേടിയ ബി 32 മുതൽ 44 വരെ , നിഷിദ്ധോ എന്നീ ചിത്രങ്ങൾ ആദ്യഘട്ടത്തിൽ ഈ ഒടിടിയുടെ ഭാഗമാകും. കേരള സ്റ്റേറ്റ് ഫിലിം ഡെവലപ്മെന്റ് കോർപ്പറേഷന്റെ ധനസഹായത്തോടെയാണ് ഈ സിനിമകൾ ഒടിടി റിലീസിന് എത്തുന്നത്.
ചലച്ചിത്ര മേഖലയുമായി ബന്ധപ്പെട്ട ഏതാനും പ്രമുഖരെ ഉൾപ്പെടുത്തിയാണ് ഒടിടി ചിത്രങ്ങൾ തിരഞ്ഞെടുക്കുന്നതിനുള്ള പാനൽ തയ്യാറാക്കിയിരിക്കുന്നത്. സന്തോഷ് ശിവൻ, ജിയോ ബേബി, ശ്യാമപ്രസാദ്, ബെന്യാമിൻ, ഒ വി ഉഷ, സണ്ണി ജോസഫ് എന്നിവർ ഉൾപ്പെടെയുള്ളവരാണ് ഈ പാനലിൽ ഉള്ളത്. ഇവർ തിരഞ്ഞെടുക്കുന്ന ചിത്രങ്ങൾ മാത്രമായിരിക്കും സി സ്‌പേസ് ഒടിടിയിൽ സ്ട്രീമിംഗ് നടത്തുകയെന്ന് ചലച്ചിത്ര സംവിധായകനും കെഎസ്എഫ്ഡിസി ചെയർമാനുമായ ഷാജി എൻ കരുൺ വ്യക്തമാക്കി.
Discussion about this post