പത്താന്‍കോട്ട് ഭീകരാക്രമണം, റിപ്പബ്ലിക് ദിനാഘോഷം എന്നിവയുടെ പശ്ചാത്തലത്തില്‍ രാജ്യത്തെ പ്രധാനകേന്ദ്രങ്ങള്‍ക്ക് അതിസുരക്ഷ ഉറപ്പാക്കാന്‍ കേന്ദ്ര ആഭ്യന്തരമന്ത്രി രാജ്‌നാഥ് സിങ് വിളിച്ചുചേര്‍ത്ത ഉന്നതതല യോഗത്തില്‍ നിര്‍ദ്ദേശം. വിമാനത്താവളങ്ങള്‍, കമ്പോളങ്ങള്‍, റെയില്‍വേസ്‌റ്റേഷനുകള്‍, പൊതുസ്ഥലങ്ങള്‍ എന്നിവിടങ്ങളില്‍ സുരക്ഷയും ജാഗ്രതയും വര്‍ധിപ്പിക്കും.
ഡല്‍ഹിയില്‍ ചേര്‍്‌ന ഉന്നതതല യോഗ്തില്‍ കേന്ദ്രപ്രതിരോധമന്ത്രി മനോഹര്‍ പരീക്കര്‍, ദേശീയസുരക്ഷാ ഉപദേഷ്ടാവ് അജിത് ഡോവല്‍, കേന്ദ്ര ആഭ്യന്തരസെക്രട്ടറി രാജീവ് മെഹര്‍ഷി, പ്രതിരോധസെക്രട്ടറി ജി. മോഹന്‍കുമാര്‍ എന്നിവര്‍ക്കൊപ്പം ഇന്റലിജന്‍സ് ബ്യൂറോ മേധാവി, എന്‍.ഐ.എ, എന്‍.എസ്.ജി, റോ എന്നിവയുടെ തലവന്‍മാരും പങ്കെടുത്തു.
പത്താന്‍കോട്ട് ആക്രമണത്തിനു ശേഷവും അതിര്‍ത്തികടന്നുള്ള തീവ്രവാദഭീഷണി നിലനില്‍ക്കുന്നുണ്ടെന്ന് യോഗം വിലയിരുത്തി. 6 മുതല്‍ 10 വരെ ജയ്‌ഷെ മുഹമ്മദ് തീവ്രവാദികള്‍ പാക്കിസ്ഥാനില്‍നിന്ന് ഇന്ത്യയിലേക്ക് കടന്നിട്ടുണ്ടെന്നാണ് ഐ.ബി യോഗത്തില്‍ നല്കിയ റിപ്പോര്‍ട്ട്. പഞ്ചാബ് പോലീസിന്റെ കണക്കുപ്രകാരം 15 തീവ്രവാദികളാണ് കടന്നിരിക്കുന്നത്. ഭീഷണി നിലനില്‍ക്കുന്ന സാഹചര്യത്തില്‍, അത് നേരിടാനുള്ള സന്നാഹങ്ങളും സുരക്ഷാ സംവിധാനങ്ങളും സാങ്കേതികസാമഗ്രികളും ശക്തമാക്കണമെന്ന് യോഗം വിലയിരുത്തി. സായുധസേന, അര്‍ധസൈനികവിഭാഗം, പോലീസ് എന്നിവയുടെ പ്രശ്‌നബാധിത സ്‌റ്റേഷനുകളില്‍ സുരക്ഷാ ഓഡിറ്റ് നടത്തി എത്രയുംവേഗം സ്ഥിതിവിവരങ്ങള്‍ ശേഖരിക്കാന്‍ യോഗം നിര്‍ദേശം നല്കിയിട്ടുണ്ട്. തീവ്രവാദഭീഷണിയെക്കുറിച്ചുള്ള മുന്‍കൂര്‍ വിവരങ്ങള്‍ സ്ഥിരീകരിച്ചുകഴിഞ്ഞാല്‍, നടപടികള്‍ക്ക് കാലതാമസമുണ്ടാകരുതെന്ന് യോഗം അഭിപ്രായപ്പെട്ടു. പത്താന്‍കോട്ട് ആക്രമണത്തെ സമയോചിതമായി നേരിട്ട സൈന്യത്തെ യോഗം അഭിനന്ദിച്ചു.
വിമാനത്താവളങ്ങളില്‍ സുരക്ഷാ പരിശോധനകള്‍ കര്‍ശനമാക്കാന്‍ യോഗം നിര്‍ദേശം നല്കിയിട്ടുണ്ട്. യാത്രക്കാര്‍ക്ക് രണ്ടു വട്ടം സുരക്ഷാപരിശോധനകള്‍ ഏര്‍പ്പെടുത്തും. ഡല്‍ഹി വിമാനത്താവളത്തില്‍ സുരക്ഷാസംവിധാനങ്ങള്‍ ഇരട്ടിയാക്കി. റിപ്പബ്ലിക് ദിന പരേഡ് നടക്കുന്ന രാജ്പഥിലും പരിസരങ്ങളിലും അതിജാഗ്രതാ നിര്‍ദേശമുണ്ട്. റിപ്പബ്ലിക് ദിനത്തില്‍ സുരക്ഷയൊരുക്കാന്‍ ഡല്‍ഹിയില്‍ പതിനായിരം സുരക്ഷാ ഉദ്യോഗസ്ഥരെക്കൂടി നിയോഗിക്കും.
Discussion about this post