ചെന്നൈ: പൗരത്വ നിയമ ഭേദഗതി നടപ്പിലാക്കുന്നതിനെ എതിർത്ത് നടനും തമിഴക വെട്രി കഴകം നേതാവുമായ വിജയ്. നിയമം ഒരിക്കലും അംഗീകരിക്കാൻ കഴിയില്ല. തമിഴ്നാട്ടിൽ ഒരിക്കലും ഈ നിയമം നടപ്പിലാക്കാൻ അനുവദിക്കരുത് എന്നും അദ്ദേഹം കൂട്ടിച്ചേർത്തു. പ്രധാനമന്ത്രിയുടെ പ്രഖ്യാപനത്തിന് പിന്നാലെ തമിഴക വെട്രി കഴകം പുറത്തിറക്കിയ ഔദ്യോഗിക പ്രസ്താവനയിലാണ് ഇക്കാര്യങ്ങൾ ഉള്ളത്.
പൗരത്വ നിയമ ഭേദഗതി ഒരിക്കലും അംഗീകരിക്കാൻ കഴിയില്ല. അത് നമ്മുടെ രാജ്യത്തിന്റെ സാമൂഹിക ഐക്യം തകർക്കും. ഈ നിയമം ഒരിക്കലും നടപ്പിലാക്കരുത് എന്നാണ് തമിഴ്നാട് സർക്കാരിനോട് അഭ്യർത്ഥിക്കാനുള്ളത്. ഇതിനായി നേതാക്കൾ ശ്രദ്ധ പുലർത്തണം എന്നും അദ്ദേഹം കൂട്ടിച്ചേർത്തു.
രാജ്യത്തെ ഭിന്നിപ്പിച്ച് ഭരിക്കാനാണ് ബിജെപിയുടെ ശ്രമം. പൊതുതിരഞ്ഞെടുപ്പിന് മുൻപ് തന്നെ സമൂഹത്തിൽ ധ്രുവീകരണം ഉണ്ടാക്കാനാണ് കേന്ദ്രസർക്കാർ ലക്ഷ്യമിടുന്നത്. രാജ്യത്തെ ഭിന്നിപ്പിക്കാൻ അനുവദിക്കരുത് എന്നും വിജയ് ആവശ്യപ്പെട്ടു.
2019 ലായിരുന്നു കേന്ദ്രസർക്കാർ പൗരത്വ ഭേദഗതി നിയമം പാസാക്കിയത്. എന്നാൽ പിന്നീട് കൊറോണ മഹാമാരി വന്നതോട് കൂടി ഇത് നടപ്പിലാക്കുന്നത് വൈകുകയായിരുന്നു. 2014 ഡിസംബർ 31 ന് മുൻപായി പാകിസ്താൻ, ബംഗ്ലാദേശ്, അഫ്ഗാനിസ്ഥാൻ എന്നിവിടങ്ങളിൽ നിന്നും ഇന്ത്യയിലേക്ക് കുടിയേറിയവർക്ക് പൗരത്വം നൽകുന്നതാണ് ഈ നിയമം.
Discussion about this post