ഗുജറാത്തിലെ ജാംനഗറിൽ നടന്ന അംബാനി കുടുംബത്തിന്റെ നവരാത്രി ആഘോഷങ്ങൾക്കിടെ മുൻ ഇന്ത്യൻ ക്രിക്കറ്റ് ക്യാപ്റ്റൻ എം.എസ് ധോണിയും ഭാര്യ സാക്ഷി ധോണിയും തമ്മിലുള്ള രസകരമായ സൗഹൃദ നിമിഷത്തിന്റെ വീഡിയോ സോഷ്യൽ മീഡിയയിൽ തരംഗമാകുന്നു.
ആഘോഷച്ചടങ്ങിൽ പങ്കെടുക്കാനെത്തിയ ദമ്പതിമാർക്കിടയിലെ കുസൃതി നിറഞ്ഞ നിമിഷങ്ങളാണ് ആരാധകരുടെ ശ്രദ്ധ കവർന്നത്. സാക്ഷിക്ക് ഐസ്ക്രീം നൽകാനെന്ന വ്യാജേന സ്പൂൺ അരികിലേക്ക് കൊണ്ടുവരികയും സാക്ഷി കഴിക്കാൻ തുടങ്ങുമ്പോൾ ധോണി അത് പെട്ടെന്ന് പിൻവലിച്ച് സ്വന്തമായി കഴിക്കുകയും ചെയ്യുന്നതാണ് വീഡിയോയിലുള്ളത്.
ധോണി ഈ തമാശ ആവർത്തിച്ചതോടെ ചിരിച്ചുകൊണ്ട് സാക്ഷി അദ്ദേഹത്തിന്റെ കയ്യിൽ തട്ടുന്നതും കാണാം. കളിക്കളത്തിലെ ശാന്തനായ നായകനിൽ നിന്ന് വ്യത്യസ്തമായി ധോണിയുടെ കുസൃതി നിറഞ്ഞ ശൈലിയെ ആരാധകർ ഇരുകൈയും നീട്ടിയാണ് സ്വീകരിച്ചിരിക്കുന്നത്. പ്രമുഖ വ്യവസായികളും സിനിമാ താരങ്ങളും കായിക പ്രതിഭകളും അണിനിരന്ന വലിയ ആഘോഷച്ചടങ്ങിൽ നിന്നുള്ള ഈ ദൃശ്യങ്ങൾ നിമിഷനേരം കൊണ്ടാണ് ഇന്റർനെറ്റിൽ വൈറലായത്.
https://twitter.com/i/status/2112051757140595062
