സോൾ : ലൈംഗികാതിക്രമ കേസിൽ ‘സ്ക്വിഡ് ഗെയിം’ താരം ഓ യങ് സു കുറ്റക്കാരൻ ആണെന്ന് കണ്ടെത്തി കോടതി. 2017 ൽ നടന്ന കേസിലാണ് കോടതി വിധി പ്രസ്താവിച്ചിരിക്കുന്നത്. 79 വയസ്സുകാരനായ ഓ യങ് സുവിന് എട്ടുമാസത്തെ തടവ് ശിക്ഷയാണ് കോടതി നൽകിയിട്ടുള്ളത്. കൂടാതെ ലൈംഗിക അതിക്രമങ്ങളെ കുറിച്ച് 40 മണിക്കൂർ ക്ലാസും ശിക്ഷയുടെ ഭാഗമായി അദ്ദേഹത്തിന് നൽകിയിട്ടുണ്ട്.
തടവ് ശിക്ഷയോടൊപ്പം തന്നെ അഭിനയിക്കുന്നതിൽ നിന്നും ഓ യങ് സുവിനെ കോടതി സസ്പെൻഡ് ചെയ്തിട്ടുണ്ട്. രണ്ടുവർഷത്തേക്കാണ് അഭിനയത്തിൽ നിന്നും വിലക്ക് ഏർപ്പെടുത്തിയിട്ടുള്ളത്. ദക്ഷിണ കൊറിയയുടെ വടക്ക് പടിഞ്ഞാറൻ മേഖലയിൽ ഉള്ള സുവോൺ ജില്ലാ കോടതിയാണ് ഓ യങ് സുവിന് ശിക്ഷ വിധിച്ചിരിക്കുന്നത്.
‘സ്ക്വിഡ് ഗെയിം’ എന്ന ജനപ്രിയ നെറ്റ്ഫ്ലിക്സ് സീരീസിലൂടെ ആഗോളതലത്തിൽ തന്നെ ശ്രദ്ധ പിടിച്ചുപറ്റിയ നടനാണ് ഓ യങ് സു. ഈ സീരീസിലെ പ്രധാന കഥാപാത്രമായ ഓ ഇൽ-നാം ആയിട്ടാണ് ഓ യങ് സു അഭിനയിച്ചിരുന്നത്. 2022ൽ മികച്ച സഹനടന് ഉള്ള ഗോൾഡൻ ഗ്ലോബ് പുരസ്കാരവും അദ്ദേഹം സ്വന്തമാക്കിയിരുന്നു. ഗോൾഡൻ ഗ്ലോബ് പുരസ്കാരത്തിന് അർഹനാകുന്ന ആദ്യ ദക്ഷിണകൊറിയൻ താരമെന്ന നിലയിൽ വലിയ സ്വീകാര്യത ആയിരുന്നു രാജ്യത്ത് അദ്ദേഹത്തിന് ലഭിച്ചിരുന്നത്.
Discussion about this post