ന്യൂഡൽഹി: മദ്യനയ അഴിമതിയുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ സുപ്രീംകോടതിയെ സമീപിക്കാൻ അറസ്റ്റിലായ കവിത. ഇഡിയുടെ അറസ്റ്റ് ചെയ്ത നടപടി ചോദ്യം ചെയ്തുകൊണ്ടാണ് കവിത കോടതിയെ സമീപിക്കാൻ ഒരുങ്ങുന്നത്. ഇതിന് പുറമേ കോടതിയിൽ ജാമ്യഹർജിയും നൽകും.
അറസ്റ്റ് അന്യായമാണെന്ന് ചൂണ്ടിക്കാട്ടിയാകും കോടതിയിൽ ഹർജി നൽകുക. ഇന്ന് തന്നെ അടിയന്തിരമായി ഹർജി പരിഗണിക്കാനും കവിത കോടതിയോട് ആവശ്യപ്പെടും. ഇന്നലെയാണ് കവിതയെ അറസ്റ്റ് ചെയ്തത്.
കേസുമായി ബന്ധപ്പെട്ട് ഇന്നലെ വസതിയിൽ ഇഡി പരിശോധന നടത്തിയിരുന്നു. ഇതിന് പിന്നാലെയാണ് കവിതയുടെ അറസ്റ്റ് രേഖപ്പെടുത്തിയത്. 13 അംഗ സംഘമായിരുന്നു പരിശോധനയ്ക്കായി എത്തിയത്. ഇതിന് പിന്നാലെ അറസ്റ്റ് രേഖപ്പെടുത്തുകയായിരുന്നു. തുടർന്ന് ഡൽഹിയിലേക്ക് എത്തിച്ചു.
കവിതയുടെ അറസ്റ്റ് നിയമവിരുദ്ധമാണെന്നാണ് അഭിഭാഷകരുടെ ആരോപണം. ഇതേ തുടർന്നാണ് സുപ്രീംകോടതിയിൽ ഹർജിയ്ക്കൊരുങ്ങുന്നത്. എന്നാൽ പരിശോധനയ്ക്കിടെ പിടിച്ചെടുത്ത നിർണായക തെളിവുകളുടെ അടിസ്ഥാനത്തിലാണ് കവിതയെ അറസ്റ്റ് ചെയ്തത് എന്നാണ് ഇഡി അറിയിക്കുന്നത്.
