കൊല്ലം : ബന്ധുവായ 23 വയസ്സുകാരനെ യുവാവ് പട്ടാപ്പകൽ പെട്രോൾ ഒഴിച്ച് കത്തിച്ചു കൊലപ്പെടുത്തി. കൊല്ലം ചടയമംഗലത്താണ് സംഭവം. കുന്നുംപുറം സ്വദേശിയായ കലേഷ് ആണ് മരണപ്പെട്ടത്. ചടയമംഗലം പോരേടത്ത് വച്ച് കലേഷിന്റെ ബന്ധുവായ സനൽ എന്ന യുവാവാണ് ഇയാളെ പെട്രോൾ ഒഴിച്ച് കത്തിച്ചത്.
സനലിന്റെ ഭാര്യയെ കലേഷ് ശല്യപ്പെടുത്തിയതിന്റെ പ്രതികാരമായാണ് ഇയാൾ യുവാവിനെ പെട്രോൾ ഒഴിച്ച് കത്തിച്ചിരുന്നത്. ജോലി ചെയ്യുന്ന സ്ഥാപനത്തിൽ അതിക്രമിച്ചു കയറിയാണ് ബക്കറ്റിൽ കൊണ്ടുവന്ന പെട്രോൾ സനൽ കലേഷിന്റെ ശരീരത്തിൽ ഒഴിച്ച് തീ കൊളുത്തിയത്. പെട്രോൾ ശരീരത്തിൽ ഒഴിച്ചപ്പോൾ പുറത്തേക്ക് ഓടിയ കലേഷിന്റെ ദേഹത്തേക്ക് ഇയാൾ പന്തത്തിൽ തീ കൊളുത്തിയശേഷം എറിഞ്ഞിടുകയായിരുന്നു.
സംഭവസ്ഥലത്ത് ഓടിക്കൂടിയ നാട്ടുകാർ കലേഷിനെ ആശുപത്രിയിൽ എത്തിച്ചെങ്കിലും 80 ശതമാനം പൊള്ളലേറ്റിരുന്നു.
പാരിപ്പള്ളി മെഡിക്കൽ കോളേജ് ആശുപത്രിയിലെ തീവ്ര പരിചരണ വിഭാഗത്തിൽ ചികിത്സയിൽ കഴിയവേയാണ് കലേഷ് മരിച്ചത്. സംഭവത്തെ തുടർന്ന് ചടയമംഗലം പോലീസ് സ്റ്റേഷനിൽ എത്തി പ്രതി സനൽ കീഴടങ്ങിയിരുന്നു. കോടതിയിൽ ഹാജരാക്കിയ സനലിനെ റിമാൻഡ് ചെയ്തു.
Discussion about this post