നീലത്താമര എന്ന സിനിമയിലൂടെ അഭിനയ രംഗത്തേക്ക് വന്ന അമല പോളിന് പിന്നീട് കരിയറിൽ വൻ കുതിച്ചു ചാട്ടമാണ് സംഭവിച്ചത്. തമിഴകത്ത് സൂപ്പർസ്റ്റാർ സിനിമകളിൽ നായികയായി തിളങ്ങിയതിനൊപ്പം, തെലുങ്ക് സിനിമകളിലും അഭിനയിച്ചു.
താര റാണിയായപ്പോൾ മലയാളത്തിലും മികച്ച സിനിമകൾ അമലയ്ക്ക് ലഭിച്ചു. റൺ ബേബി റൺ, ഒരു ഇന്ത്യൻ പ്രണയകഥ, മിലി തുടങ്ങിയ സിനിമകളെല്ലാം ഇതിന് ഉദാഹരണമാണ്. എന്നാൽ, മൈന എന്ന സിനിമയാണ് നടിയുടെ കരിയറിലെ നാഴികക്കല്ല്. ആ ചിത്രം ഹിറ്റായിരുന്നില്ലെങ്കിൽ അമലയ്ക്ക് ഇന്നത്തെ നിലയിലേക്ക് ഉയരാൻ കഴിയുമായിരുന്നില്ല.
അതേസമയം, നടിയ്ക്ക് വിനയായ ഒരു സിനിമയുമുണ്ട്. സിന്ധുസമവേലി എന്ന തമിഴ് ചിത്രമാണ് ഇത്. ഇന്റിമേറ്റ് രംഗങ്ങളും വിവാദപരമായ കഥാഗതിയുമുള്ള സിനിമ, അന്ന് വലിയ ചർച്ചകൾക്ക് വഴിതെളിച്ചിരുന്നു. മൈന കഴിഞ്ഞാണ് അമല സിന്ധുസമവേലിയിൽ അഭിനയിച്ചത്. പക്ഷെ, മൈനയ്ക്ക് മുമ്പ് അത് റിലീസായി.
ആ സിനിമയുടെ വിവാദങ്ങൾ കാരണം മൈനയുടെ പ്രമോഷനിൽ നിന്നെല്ലാം താരത്തെ മാറ്റി നിർത്തിയിരുന്നു. സിന്ധു സമവേലിയിലെ ഇമേജ് മൈനയിലെ കഥാപാത്രത്തിലേക്ക് പോകേണ്ടെന്ന് കരുതിയായിരുന്നു അത്. പക്ഷെ, അർഹമായ വിജയം കൈവരിക്കുന്നതിൽ നിന്നും ആർക്കും നമ്മളെ തടയാൻ പറ്റില്ലെന്നാണ് അമലാ പോൾ പറയുന്നത്. ഇതിന് ഏറ്റവും വലിയ ഉദാഹരണമായാണ് അമല പോൾ ഈ സംഭവത്തെ കാണുന്നത്. അമല നായികയായെത്തിയ മൈന സൂപ്പർഹിറ്റായിയിരുന്നു. സിനിമ റിലീസായതിന് ശേഷം പ്രേക്ഷകർ എന്നെ ഒരുപാട് സ്നേഹിച്ചു. ഒടുവിൽ അണിയറ പ്രവർത്തകർക്ക് തന്നെ പ്രമോഷന് വിളിക്കേണ്ടി വന്നെന്നും അമല പോൾ വ്യക്തമാക്കി.
ആടുജീവിതമാണ് അമല പോളിന്റെ പുതിയ സിനിമ. ബ്ലെസി സംവിധാനം ചെയ്യുന്ന ചിത്രത്തിൽ പൃഥിരാജാണ് നായകൻ. വർഷങ്ങളായി പ്രേക്ഷകർ കാത്തിരിക്കുന്ന സിനിമയാണ് ആടുജീവിതം. ലെവൽ ക്രോസ്, ദ്വിജ തുടങ്ങി ഒന്നിലേറെ സിനിമകൾ അമലയുടേതായി ഇനി റിലീസ് ചെയ്യാനുണ്ട്. കരിയറിനൊപ്പം വ്യക്തി ജീവിതത്തിലും അമല പോളിന് വിശേഷങ്ങളേറെയാണ്. അടുത്തിടെ വിവാഹിതയായ നടി ഗർഭിണിയാണ്. ആദ്യത്തെ കുഞ്ഞിനായുള്ള കാത്തിരിപ്പിലാണ് അമല.
Discussion about this post