ഡല്ഹി: മാനവ വിഭവ വികസന മന്ത്രി സ്മൃതി ഇറാനി രാജ്യത്തിന്റെ പ്രഥമ വിദ്യാഭ്യാസ മന്ത്രി മൗലാന
അബുല്കലാം ആസാദിനു തുല്യയാണെന്ന് പ്രമുഖ ഇസ്ലാമിക ചരിത്ര പണ്ഡിതന് പ്രസംഗിച്ചെന്ന വാര്ത്തക്കെതിരെയാണ് ഒരു വിഭാഗം അധ്യാപകര് രംഗത്തെത്തിയത്. ജാമിഅ മില്ലിയയില് നടന്ന ചടങ്ങില് സര്വകലാശാലയിലെ മുന് അധ്യാപകനും ദേശീയ ഭാഷാ ന്യൂനപക്ഷ കമീഷന് അധ്യക്ഷനുമായ പ്രഫ. അക്താറുല് വസീ മന്ത്രിയെ പുകഴ്ത്തിയത് ചര്ച്ചയായിരുന്നു.
വാര്ത്തയില് വാസ്തവമില്ലെന്ന് പറഞ്ഞ് ജാമിഅ മില്ലിയ ഇസ്ലാമിയയിലെ ഒരു കൂട്ടം അധ്യാപകരാണ് രംഗത്ത് എത്തിയത്. സബ്കാ സാഥ് സബ് കാ വികാസ് എന്ന മുദ്രാവാക്യം യാഥാര്ഥ്യമാവണമെങ്കില് മറ്റുള്ളവരെ സംശയദൃഷ്ടിയോടെ നോക്കുന്നതു നിര്ത്തണമെന്നും മുസ്ലിംകളുള്പ്പെടെ ദുര്ബല വിഭാഗങ്ങളുടെ വിദ്യാഭ്യാസ പിന്നാക്കാവസ്ഥ തുടര്ന്നാല് 2020ല് ഇന്ത്യയെ ലോക ശക്തിയാക്കി മാറ്റുക എന്ന ദൗത്യം സാധ്യമാവില്ലെന്നുമായിരുന്നു അക്താറുല് പ്രസംഗിച്ചതെന്നാണ് അധ്യാപകരുടെ വിശദീകരണം.
മുസ്ലിം സമൂഹത്തിന്റെ വിദ്യാഭ്യാസ പിന്നാക്കാവസ്ഥ വരച്ചുകാണിക്കുന്ന പ്രഭാഷണമായിരുന്നു പ്രഫസറുടേതെന്നും അധ്യാപകര് പറയുന്നു. ആര്.എസ്.എസ് അനുകൂല പരിപാടികളിലും പ്രചാരണങ്ങളിലും പങ്കാളികളാവാറുള്ള മുസ്ലിം യൂത്ത് ഫോര് ഇന്ത്യ എന്ന സംഘടന നടത്തിയ പരിപാടിയാണ് വിവാദമായത്. ബിജെപി അനുകൂല നിലപാടുള്ള മൗലാന ആസാദ് ഉര്ദു സര്വകലാശാല വി.സി സഫര് സരേഷ്വാല, ജാമിയ വി.സി പ്രഫ. തലത് അസീസ് തുടങ്ങിയവരും പരിപാടിയില് പങ്കെടുത്തിരുന്നു.
Discussion about this post