വമ്പൻ ഓഫറുകൾ ഉപഭോക്താക്കൾക്ക് നൽകി ഞെട്ടിക്കുന്ന കമ്പനികളെ കുറിച്ച് കേട്ടിട്ടില്ലേ. എന്നാൽ ഇവിടെ ഒരു കമ്പനിയല്ല ഒരു പ്രാദേശിക ഭരണകൂടം ആളുകൾക്ക് മുമ്പിൽ വച്ച ഓഫർ കണ്ട് ഞെട്ടിയിരിക്കുകയാണ് ലോകം. തങ്ങളുടെ നാട്ടിൽ അലഞ്ഞു തിരഞ്ഞു നടക്കുന്ന ആടുകളെ ആർക്ക് വേണമെങ്കിലും സൗജന്യമായി പിടിച്ചുകൊണ്ട് പോകാം എന്ന ഓഫർ മുന്നോട്ടുവച്ചിരിക്കുകയാണ് വിദൂര ഇറ്റാലിയൻ ദ്വീപായ അലികുഡിയിലെ പ്രാദേശിക ഭരണകൂടം.
സിസിലിക്ക് വടക്ക് ഇയോലിയൻ ദ്വീപുകളുടെ ഭാഗമാണ് അലികുഡി എന്ന കുഞ്ഞൻ ദ്വീപ്. വെറും നൂറ് പേർ മാത്രമാണ് ഇവിടെ താമസം. പക്ഷേ ആടുകളാകട്ടെ, ഇതിന്റെ ആറിരട്ടിയുണ്ട്.
ഇവിടുത്തെ കൃഷി വ്യാപകമായി നശിപ്പിക്കുന്ന ആടുകൾ നാട്ടുകാർക്ക് തലവേദനയാണ്. തരംകിട്ടിയാൽ വീടിനുള്ളിൽ കടന്നും ഇവ അക്രമങ്ങൾ കാട്ടും.ഇതോടെയാണ് മേയർ റിക്കാർഡോ ഗുല്ലോ ഒരു പോംവഴി കണ്ടെത്തിയത്. ആർക്ക് വേണമെങ്കിലും ഈ ആടുകളെ ദത്തെടുത്ത് കൂടെ കൊണ്ടുപോകാം. ഇതിനുള്ള അപേക്ഷകൾ ഏപ്രിൽ 10നകം നൽകണം. ആടുകളെ ദ്വീപിലെത്തി പിടിച്ചുകൊണ്ടുപോകാൻ സമയം ലഭിക്കും.
ഇവയെ കൊന്ന് എണ്ണം കുറയ്ക്കുന്നതിനോട് ദ്വീപിലുള്ളവർക്ക് താത്പര്യമില്ലാത്തതിനാലാണ് ഇത്തരമൊരു തീരുമാനം സ്വീകരിച്ചത്.ഒരു കർഷകൻ വളർത്താനായാണ് ആടുകളെ ആദ്യമായി ദ്വീപിലെത്തിച്ചത്. വൈകാതെ ഇദ്ദേഹം ആടുകളെ ദ്വീപിൽ സ്വതന്ത്രമായി ജീവിക്കാൻ അനുവദിക്കുകയായിരുന്നു. എണ്ണം പെരുകിയതോടെ ജനവാസ മേഖലയിലായി വാസം.
