ദിവസേന സ്വർണ്ണത്തരികൾ പുറന്തള്ളുന്ന ഒരു അഗ്നിപർവ്വതം ആണ് ഇപ്പോൾ ശ്രദ്ധ നേടുന്നത്. ഓരോ ദിവസവും 80 ഗ്രാമിലേറെ സ്വർണമാണ് ഈ അഗ്നിപർവ്വതം പുറന്തള്ളുന്നത്. എന്നാൽ ഈ സ്വർണം ഇവിടെ ആർക്കും വേണ്ട എന്നുള്ളതാണ് ഏറ്റവും വലിയ സവിശേഷത. അതിന് കാരണം ഈ വ്യത്യസ്തമായ അഗ്നിപർവ്വതം സ്ഥിതിചെയ്യുന്നത് അന്റാർട്ടിക്കയിലാണ് എന്നുള്ളതാണ്.
അന്റാർട്ടിക്കയിലെ ഇറെബസ് അഗ്നിപർവ്വതമാണ് ദിവസേന 80 ഗ്രാമോളം സ്വർണം പുറന്തള്ളുന്നത്. ക്രിസ്റ്റലുകൾ പോലെയുള്ള സ്വർണ്ണത്തരികൾ ആയാണ് ഈ അഗ്നിപർവതത്തിൽ നിന്നും സ്വർണ്ണം പുറന്തള്ളുന്നതായി കണ്ടെത്തിയത്. നാസയുടെ എർത്ത് ഒബ്സർവേറ്ററി ആണ് ഈ അഗ്നിപർവതത്തിലെ സ്വർണ്ണ രഹസ്യം വെളിപ്പെടുത്തിയിരിക്കുന്നത്.
എന്നാൽ അന്റാർട്ടിക്കയിലെ തന്നെ മോശമായ കാലാവസ്ഥ ആയതിനാൽ ഇവിടെ നിന്നും സ്വർണ്ണത്തരികൾ ശേഖരിച്ച് വേർതിരിച്ചെടുക്കുക എന്നുള്ളത് പ്രായോഗികമല്ല എന്നും നാസ അറിയിക്കുന്നു. അന്റാർട്ടിക്കയിലെ നിരവധി അഗ്നിപർവ്വതങ്ങളിൽ ഏറ്റവും ഉയരം കൂടിയ സജീവ അഗ്നിപർവതമാണ് ഇറെബസ്. 12,448 അടി ഉയരത്തിലുള്ള ഈ അഗ്നിപർവ്വതം 1841ൽ ക്യാപ്റ്റൻ സർ ജയിംസ് ക്ലാർക്ക് റോസ് ആണ് ആദ്യമായി കണ്ടെത്തിയത് എന്നാണ് പറയപ്പെടുന്നത്.
