ന്യൂഡൽഹി : ഇന്ത്യയിൽ കഴിഞ്ഞ ഏതാനും വർഷങ്ങളായി തൊഴിലില്ലായ്മ നിരക്കിൽ വൻ കുറവാണ് വന്നിട്ടുള്ളത് എന്ന് റിപ്പോർട്ട്. ഇന്റർനാഷണൽ ലേബർ ഓർഗനൈസേഷനും ഇൻസ്റ്റിറ്റ്യൂട്ട് ഫോർ ഹ്യൂമൻ ഡെവലപ്മെന്റും സംയുക്തമായി പുറത്തിറക്കിയ റിപ്പോർട്ടിലാണ് ഇക്കാര്യം സൂചിപ്പിക്കുന്നത്. 2024ലെ ഇന്ത്യ എംപ്ലോയ്മെന്റ് റിപ്പോർട്ട് അനുസരിച്ച് ഇന്ത്യയിൽ യുവാക്കൾ നേരിടുന്ന പ്രധാന പ്രശ്നം സാങ്കേതിക പുരോഗതിയുടെ ഭാഗമായ വെല്ലുവിളികൾ ആണെന്നാണ് പറയുന്നത്.
2019 മുതൽ ഇന്ത്യയിൽ തൊഴിൽ വിപണി സൂചകങ്ങളിൽ വലിയ പുരോഗതി രേഖപ്പെടുത്തിയിട്ടുണ്ട് എന്ന് റിപ്പോർട്ട് ചൂണ്ടിക്കാണിക്കുന്നു. എന്നാൽ കുറഞ്ഞ വേതനം രാജ്യം നേരിടുന്ന ഒരു പ്രധാന പ്രശ്നമാണ്. രാജ്യത്ത് സ്വയംതൊഴിൽ ചെയ്യുന്നവരുടെയും അസംഘടിത മേഖലയിൽ തൊഴിൽ ചെയ്യുന്നവരുടെയും എണ്ണത്തിലും വലിയ വർദ്ധനവാണ് ഉണ്ടായിട്ടുള്ളത്.
ഗ്രാമീണ മേഖലയിൽ നിന്നുള്ള സ്ത്രീകളുടെ തൊഴിൽ പങ്കാളിത്തത്തിലും വർദ്ധനം ഉണ്ടായതായി റിപ്പോർട്ട് സൂചിപ്പിക്കുന്നു. തൊഴിലില്ലായ്മ നിരക്കിൽ കുറവുണ്ടായിട്ടുണ്ടെങ്കിലും വീട്ടുജോലിയിൽ മാത്രം ഒതുങ്ങുന്ന സ്ത്രീകളുടെ എണ്ണത്തിലും വർദ്ധനവ് ഉണ്ടായതാണ് റിപ്പോർട്ട് സൂചിപ്പിക്കുന്നത്.
