കൊച്ചി;മാസപ്പടി കേസില് മുഖ്യമന്ത്രി പിണറായി വിജയന്, മകള് വീണാ വിജയന് എന്നിവര്ക്കെതിരെ അന്വേഷണം ആവശ്യപ്പെട്ട് മാത്യു കുഴല്നാടന് എം.എല്.എ. നല്കിയ ഹര്ജി തള്ളി. മാസപ്പടി കേസില് കോടതി നേരിട്ട് അന്വേഷണം നടത്തണമെന്നായിരുന്നു മാത്യു കുഴല്നാടന്റെ ആവശ്യം. എന്നാല് വിശദമായ വാദം കേട്ട ശേഷം കോടതി ഈ ആവശ്യം തള്ളുകയായിരുന്നു. തിരുവനന്തപുരം വിജിലന്സ് കോടതിയാണ് ഹര്ജി തള്ളിയത്. നിയമപോരാട്ടം തുടരുമെന്ന് മാത്യു കുഴല്നാടന് പ്രതികരിച്ചു. കോടതിയുടെ തീരുമാനം അപ്രതീക്ഷിതമാണെന്നും വിധിപകർപ്പ് ലഭിച്ചശേഷം പ്രതികരിക്കാമെന്നും കുഴല്നാടന് കൂട്ടിച്ചേർത്തു.
മുഖ്യമന്ത്രി പിണറായി വിജയനും മകള് വീണയും അടക്കം ഏഴ് പേരാണ് കേസിലെ എതിര്കക്ഷികള്. പിണറായിക്കും മകള്ക്കും പുറമെ സിഎംആര്എല് ഉടമ എസ് എന് ശശിധരന് കര്ത്ത, സിഎംആര്എല്, കെഎംഎംഎല്, ഇന്ത്യന് റെയര് എര്ത്ത്സ്, എക്സാലോജിക് എന്നിവരാണ് എതിര്കക്ഷികള്.
തൃക്കുന്നപുഴയിലും ആറാട്ടുപുഴയിലും ധാതുമണല് ഖനനത്തിനായി കര്ത്ത സ്ഥലം വാങ്ങിയെങ്കിലും 2004 ലെ സംസ്ഥാന ഉത്തരവും കേന്ദ്രനിയമങ്ങളും എതിരായതിനാല് ഖനനാനുമതി ലഭ്യമായിരുന്നില്ല. കേരള ഭൂവിനിമയ ചട്ട പ്രകാരം പ്രസ്തുത ഭൂമിക്ക് ഇളവ് ലഭ്യമാക്കാനുളള കര്ത്തയുടെ ശ്രമങ്ങളും പരാജയപ്പെട്ട സാഹചര്യത്തിലാണ് വീണ സിഎംആര്എല്ലുമായി കരാറില് ഏര്പ്പെടുന്നത്. ഇതിനുശേഷം മുഖ്യമന്ത്രി നേരിട്ടിടപെട്ട് റവന്യൂ വകുപ്പിനോട് കര്ത്തയുടെ അപേക്ഷയില് പുനപരിശോധന നടത്താന് നിര്ദേശിച്ചെന്നായിരുന്നു മാത്യു കുഴൽനാടൻ്റെ ആരോപണം.
Discussion about this post