ഇന്ത്യയുടെ മുൻ ലോകകപ്പ് ജേതാവായ ക്യാപ്റ്റൻ കപിൽ ദേവ് കൗമാര ബാറ്റിങ് വിസ്മയം വൈഭവ് സൂര്യവംശിയെ വാനോളം പുകഴ്ത്തി രംഗത്തെത്തി. സച്ചിൻ തെണ്ടുൽക്കറിലും വിരാട് കോഹ്ലിയിലും മാത്രം മുൻപ് കണ്ടിട്ടുള്ള തരത്തിലുള്ള അസാധാരണമായ പ്രതിഭയാണ് ഈ 15 കാരന് ഉള്ളതെന്ന് കപിൽ ദേവ് അഭിപ്രായപ്പെട്ടു. എന്നാൽ അതോടൊപ്പം തന്നെ, ഈ യുവതാരത്തിന് ചുറ്റും വളർന്നുവരുന്ന അമിതമായ പ്രചാരണങ്ങളെയും ഹൈപ്പുകളെയും കപിൽ ദേവ് വിലക്കുകയും ചെയ്തു. താരത്തിന്റെ കരിയർ വിലയിരുത്തുന്നതിന് മുൻപ് വളരാൻ ആവശ്യമായ സമയം ഇന്ത്യൻ ക്രിക്കറ്റ് നൽകണമെന്നും അദ്ദേഹം ആവശ്യപ്പെട്ടു.
ബിഹാർ സ്വദേശിയായ ഈ ഇടങ്കയ്യൻ ബാറ്റർ രാജസ്ഥാൻ റോയൽസിലൂടെ ഐപിഎല്ലിൽ അരങ്ങേറ്റം കുറിക്കുന്ന ഏറ്റവും പ്രായം കുറഞ്ഞ താരമായി ചരിത്രം കുറിച്ചിരുന്നു. ഭയമില്ലാത്ത ബാറ്റിങ് ശൈലിയിലൂടെ ടൂർണമെന്റിൽ വൻ തരംഗമാണ് താരം സൃഷ്ടിച്ചത്. ഐപിഎൽ 2025 സീസണിൽ 7 മത്സരങ്ങളിൽ നിന്ന് 36 ശരാശരിയിലും 206 ലേറെ സ്ട്രൈക്ക് റേറ്റിലും 252 റൺസ് താരം അടിച്ചുകൂട്ടിയിരുന്നു. ആ ഫോം ഐപിഎൽ 2026-ലും തുടർന്ന സൂര്യവംശി, ടൂർണമെന്റിലെ ഏറ്റവും കൂടുതൽ റൺസ് വേട്ടക്കാരനായി മാറി ഓറഞ്ച് ക്യാപ്പ് സ്വന്തമാക്കി. 16 മത്സരങ്ങളിൽ നിന്ന് 237.30 എന്ന അവിശ്വസനീയമായ സ്ട്രൈക്ക് റേറ്റിൽ 776 റൺസ് ആണ് താരം അടിച്ചുകൂട്ടിയത്. ഈ മിന്നും പ്രകടനമാണ് അയർലൻഡ്, ഇംഗ്ലണ്ട് പര്യടനങ്ങൾക്കുള്ള ഇന്ത്യൻ ട്വന്റി-20 ടീമിലേക്ക് താരത്തിന് ആദ്യമായി വിളി സമ്മാനിച്ചത്.
സ്പോർട്സ് തക്കിനോട് സംസാരിക്കവെ സൂര്യവംശിയുടെ ബാറ്റിങ് പ്രകടനങ്ങൾ താൻ പൂർണ്ണമായി കണ്ടിട്ടില്ലെങ്കിലും താരത്തിന്റെ കഴിവിൽ പൂർണ്ണ വിശ്വാസമുണ്ടെന്ന് കപിൽ വ്യക്തമാക്കി. കപിൽ ദേവിന്റെ വാക്കുകൾ ഇങ്ങനെയായിരുന്നു: “ഞാൻ അദ്ദേഹത്തിന്റെ കളി ബിറ്റുകളായും പീസുകളായും മാത്രമേ കണ്ടിട്ടുള്ളൂ. കണ്ടതിൽ വെച്ച് അദ്ദേഹം ഒരു വലിയ പ്രതിഭയാണ് എന്നതിൽ യാതൊരു സംശയവുമില്ല. എന്നാൽ ഇപ്പോൾ ആളുകൾ അദ്ദേഹത്തെക്കുറിച്ച് വളരെയധികം സംസാരിക്കുന്നുണ്ട്. അദ്ദേഹത്തിന് കുറച്ച് സമയം നൽകൂ. ഇത്രയും ചെറിയ പ്രായത്തിൽ അദ്ദേഹത്തിന് അദ്ദേഹത്തെക്കുറിച്ചോ തന്റെ കഴിവിനെക്കുറിച്ചോ പൂർണ്ണമായ ധാരണ കാണില്ല.”
പ്രതിഭയെക്കുറിച്ച് മാത്രമാണ് സംസാരിക്കുന്നതെങ്കിൽ വൈഭവ് സൂര്യവംശി സച്ചിൻ തെണ്ടുൽക്കറുടെയും വിരാട് കോഹ്ലിയുടെയും അത്രയും മികച്ചതാണെന്ന് കപിൽ സമ്മതിച്ചു. എന്നാൽ ഈ കഴിവ് നിലവിൽ ട്വന്റി-20 ക്രിക്കറ്റിൽ മാത്രമാണ് കണ്ടിട്ടുള്ളതെന്നും മറ്റു ഫോർമാറ്റുകളിൽ താരം ഇനിയും സ്വയം തെളിയിക്കേണ്ടതുണ്ടെന്നും അദ്ദേഹം ഓർമ്മിപ്പിച്ചു. ടെസ്റ്റ് ക്രിക്കറ്റിൽ അഞ്ച് ഓവർ മെയ്ഡൻ നേരിട്ട് ക്രീസിൽ തുടരാൻ താരത്തിന് സാധിക്കുമോ എന്നതാണ് യഥാർത്ഥ ചോദ്യമെന്നും കപിൽ കൂട്ടിച്ചേർത്തു.
ട്വന്റി-20 ക്രിക്കറ്റിലെ വിജയം കൊണ്ട് മാത്രം ഒരു കളിക്കാരന്റെ കരിയർ നിർവചിക്കാൻ കഴിയില്ലെന്നും റെഡ് ബോൾ ക്രിക്കറ്റിലേക്ക് മാറുമ്പോൾ മാനസികാവസ്ഥയിൽ മാറ്റം വരുത്തേണ്ടതുണ്ടെന്നും മുൻ ഇന്ത്യൻ നായകൻ ഓർമ്മിപ്പിച്ചു. നിലവിൽ ഇന്ത്യൻ ടീമിനൊപ്പം യുണൈറ്റഡ് കിങ്ഡം പര്യടനത്തിലാണ് സൂര്യവംശി. അയർലൻഡിനെതിരായ ടി20 പരമ്പരയിലെ രണ്ട് മത്സരങ്ങളിലും താരത്തിന് അരങ്ങേറ്റത്തിന് അവസരം ലഭിച്ചിരുന്നില്ല. തുടർന്ന് ജൂലൈ ഒന്നിന് ചെസ്റ്റർ ലീ സ്ട്രീറ്റിൽ നടന്ന ഇംഗ്ലണ്ടിനെതിരായ ഒന്നാം ടി20 മത്സരത്തിന്റെ പ്ലേയിങ് ഇലവനിലും താരത്തെ ഉൾപ്പെടുത്തിയിരുന്നില്ല.
