ന്യൂഡൽഹി : പ്രധാനമന്ത്രി നരേന്ദ്രമോദിയും ബിജെപിയും ചേർന്ന് രാജ്യത്തെ ദുരിതത്തിലാക്കിയെന്ന് കോൺഗ്രസ് മുൻ അധ്യക്ഷ സോണിയ ഗാന്ധി. രാജ്യത്തിന്റെ ശോഭന ഭാവിക്കായി എല്ലാവരും കോൺഗ്രസിന് പിന്നിൽ അണിനിരക്കണം എന്നും സോണിയ ഗാന്ധി അഭ്യർത്ഥിച്ചു. കോൺഗ്രസിന്റെ സമൂഹമാദ്ധ്യമ പേജിൽ പങ്കുവെച്ച ഒരു വീഡിയോ സന്ദേശത്തിൽ സോണിയ ഗാന്ധി കോൺഗ്രസിന് വോട്ട് അഭ്യർത്ഥിക്കുകയും ചെയ്തു.
“ഇന്ന് രാജ്യത്തിന്റെ എല്ലാ കോണുകളിലും യുവാക്കൾ തൊഴിലില്ലായ്മയാണ് നേരിടുന്നത്. സ്ത്രീകൾക്ക് നേരെ അതിക്രമങ്ങൾ നടക്കുന്നു. ആദിവാസികളും ദളിതരും ന്യൂനപക്ഷങ്ങളും ഭയാനകമായ രീതിയിൽ വിവേചനം നേരിടുന്നു. പ്രധാനമന്ത്രി നരേന്ദ്രമോദിയുടെയും ബിജെപിയുടെയും ഉദ്ദേശങ്ങൾ മൂലമാണ് ഇത്തരത്തിൽ ഒരു അന്തരീക്ഷം രാജ്യത്ത് ഉണ്ടായത്” എന്നും സോണിയ ഗാന്ധി അഭിപ്രായപ്പെട്ടു.
ദരിദ്രരുടെ നീതിക്കും രാജ്യത്തെ ശക്തിപ്പെടുത്തുന്നതിനും ആയി എല്ലായിപ്പോഴും പോരാടിയിട്ടുള്ള പാർട്ടിയാണ് കോൺഗ്രസ് എന്നും തന്റെ വീഡിയോ സന്ദേശത്തിൽ സോണിയ ഗാന്ധി സൂചിപ്പിച്ചു. ” കോൺഗ്രസിന്റെ പ്രകടനപത്രികയായ ന്യായ് പത്ര ദരിദ്രരെയും സ്ത്രീകളെയും ശാക്തീകരിക്കാൻ ലക്ഷ്യമിട്ടുള്ളതാണ്. പാർശ്വവൽക്കരിക്കപ്പെട്ട സമൂഹങ്ങളെ ശക്തിപ്പെടുത്താൻ പ്രതിജ്ഞ എടുത്തിരിക്കുന്ന പാർട്ടിയാണ് കോൺഗ്രസ്. രാജ്യത്തിന്റെ ശോഭനമായ ഭാവിക്കായി എല്ലാവരും കോൺഗ്രസിന് വോട്ട് ചെയ്യുക. നമുക്ക് ഒരുമിച്ച് ശക്തവും ഏകീകൃതവുമായ ഇന്ത്യ കെട്ടിപ്പടുക്കാം ” എന്നും സോണിയാഗാന്ധി വീഡിയോ സന്ദേശത്തിൽ അഭിപ്രായപ്പെട്ടു.
Discussion about this post