തിരുവനന്തപുരം : കേരളത്തിൽ ശക്തമായ മഴ തുടർന്നുകൊണ്ടിരിക്കുകയാണ്. കാലവർഷം എത്തുന്നതിനു മുൻപേ തന്നെ പല ജില്ലകളിലും മഴക്കെടുതികൾ ആരംഭിച്ചിട്ടുണ്ട്. ഈ അവസരത്തിൽ പ്രവർത്തകരോട് സജീവമായി രംഗത്തിറങ്ങാൻ ആവശ്യപ്പെട്ടിരിക്കുകയാണ് ബിജെപി സംസ്ഥാന അധ്യക്ഷൻ കെ സുരേന്ദ്രൻ. മഴക്കെടുതിയിൽ ഉണ്ടാകുന്ന അടിയന്തരഘട്ടങ്ങളിൽ എല്ലാ പ്രവർത്തകരും സജീവമായി രംഗത്തിറങ്ങണമെന്ന് കെ സുരേന്ദ്രൻ ഫേസ്ബുക്ക് പോസ്റ്റിലൂടെയാണ് ആവശ്യപ്പെട്ടത്.
കേരളത്തിൽ അടുത്ത അഞ്ചു ദിവസത്തേക്ക് കൂടി അതിതീവ്ര മഴ തുടരുമെന്ന് കഴിഞ്ഞദിവസം കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. തമിഴ്നാട്ടിലെ തെക്കൻ തീരദേശത്തിന് മുകളിലായി ചക്രവാതച്ചുഴി നിലനിൽക്കുന്നതിനാൽ കേരളത്തിൽ മഴ കൂടുതൽ ശക്തമാകാൻ ആണ് സാധ്യത . വടക്കൻ കേരളത്തിന് മുകളിലായി മറ്റൊരു ചക്രവാതച്ചുഴിയും തമിഴ്നാടിന്റെ തെക്കൻ തീരം മുതൽ കർണാടകയുടെ വടക്കൻ തീരം വരെ ഒരു ന്യൂനമർദ്ദ പാത്തിയും രൂപപ്പെട്ടിട്ടുണ്ട്. ഈ സാഹചര്യത്തിൽ കാലവർഷത്തിനു മുൻപേ തന്നെ കേരളത്തിൽ അതിശക്തമായ മഴയും മിന്നലും കാറ്റും ഉണ്ടാകാൻ സാധ്യത ഉള്ളതായാണ് കണക്കാക്കപ്പെടുന്നത്.
Discussion about this post