ന്യൂഡൽഹി: നാഷണൽ ഡെമോക്രാറ്റിക് അലയൻസിന്റെ (എൻഡിഎ) പാർലമെന്ററി പാർട്ടി യോഗത്തിൽ അദ്ധ്യക്ഷത വഹിച്ച് പ്രധാനമന്ത്രി നരേന്ദ്ര മോദി. മൂന്നാം തവണയും പ്രധാനമന്ത്രിയായി അധികാരമേറ്റതിന് ശേഷമുള്ള പാർലമെന്റിന്റെ ആദ്യ സമ്മേളനത്തിൽ ഭരണകക്ഷിയിലെ എംപിമാരെ ആദ്യമായി അഭിസംബോധന ചെയ്യുകയായിരുന്നു അദ്ദേഹം. കോൺഗ്രസ് നേതാവ് രാഹുൽ ഗാന്ധി ലോക്സഭയിൽ ചെയ്തതുപോലെ പെരുമാറരുതെന്ന് യോഗത്തിനിടെ എംപിമാരോട് പ്രധാനമന്ത്രി പറഞ്ഞു. ജവഹർലാൽ നെഹ്റുവിന് ശേഷം ആർക്കും നേടാൻ കഴിയാത്ത മൂന്നാം വിജയം ഒരു ചായക്കടക്കാാരൻ നേടിയതിൽ പ്രതിപക്ഷം ഏറെ അസ്വസ്തരാണെന്നും പ്രധാനമന്ത്രി കൂട്ടിച്ചേർത്തു.
അതേസമയം, രാഷ്ട്രപതിയുടെ പ്രസംഗത്തിനുള്ള നന്ദിപ്രമേയത്തിന്റെ ചർച്ചയ്ക്ക് ലോക്സഭയിൽ പ്രധാനമന്ത്രി നരേന്ദ്ര മോദി ഇന്ന് മറുപടി നൽകും. ഉച്ചയ്ക്കു ശേഷമാണ് പ്രധാനമന്ത്രി മറുപടി പറയുക. പ്രതിപക്ഷനേതാവ് രാഹുൽഗാന്ധി ഇന്നലെ ഗുരുതരമായ വിമർശനങ്ങളാണ് നന്ദി പ്രമേയത്തെ എതിർത്ത് സഭയിൽ വ്യക്തമാക്കിയത്. രാഹുൽ ഗാന്ധി ലോക്സഭയിൽ നടത്തിയ പരാമർശങ്ങൾ ഹിന്ദു സമൂഹത്തെ അപമാനിക്കുന്നതാണെന്ന് പ്രധാനമന്ത്രി നരേന്ദ്രമോദി ലോക്സഭയിൽ പരാമർശിച്ചിരുന്നു.
രാജ്യസഭയിലും രാഷ്ട്രപതിയുടെ നയപ്രഖ്യാപനത്തിന് മേലുള്ള നന്ദി പ്രമേയ ചർച്ച ഇന്ന് പൂർത്തിയാകും. രാഹുൽ ഗാന്ധിയുടെ ലോക്സഭയിലെ പരാമർശങ്ങൾക്കെതിരെ പ്രതിഷേധിക്കാനാണ് ബിജെപി തീരുമാനം. വിഷയത്തിൽ സ്പീക്കർക്ക് പരാതി നൽകുന്നത് അടക്കമുള്ള നടപടികൾ ആകും ബിജെപി സ്വീകരിക്കുക.
Discussion about this post