ന്യൂഡൽഹി: ബംഗ്ലാദേശിൽ നിന്നുള്ള അനധികൃത കുടിയേറ്റക്കാർ ഉയർത്തുന്ന വെല്ലുവിളികൾ നേരിടാൻ ജാർഖണ്ഡിൻ്റെയും പശ്ചിമ ബംഗാളിൻ്റെയും ചില ഭാഗങ്ങൾ കേന്ദ്രഭരണ പ്രദേശമായി പ്രഖ്യാപിക്കണമെന്ന് ബിജെപി എംപി നിഷികാന്ത് ദുബെ വ്യാഴാഴ്ച ആവശ്യപ്പെട്ടു. അസമിന് സമാനമായ എൻആർസി ഈ പ്രദേശങ്ങളിൽ നടപ്പാക്കണമെന്നും അദ്ദേഹം ആവശ്യപ്പെട്ടു.
ഈ അനധികൃത കുടിയേറ്റം തടയാൻ ചില നടപടികൾ സ്വീകരിച്ചില്ലെങ്കിൽ ഹിന്ദുക്കൾ ഇവിടങ്ങളിൽ നിന്ന് അപ്രത്യക്ഷമാകുമെന്ന് നിഷികാന്ത് ദുബെ തുറന്നു പറഞ്ഞു.
ലോക്‌സഭയിലെ സീറോ അവറിൽ വിഷയം ഉന്നയിച്ച ദുബെ, ബംഗ്ലാദേശിൽ നിന്നുള്ള ആളുകളുടെ നുഴഞ്ഞുകയറ്റം കാരണം ജാർഖണ്ഡിലെ സന്താൽ പർഗാനാസ് മേഖലയിലെ ആദിവാസികളുടെ ജനസംഖ്യ കുറഞ്ഞുവെന്ന് അവകാശപ്പെട്ടു.
മാൾഡ, മുർഷിദാബാദ്, അരാരിയ, കിഷൻഗഞ്ച്, കതിഹാർ, സന്താൽ പർഗാനാസ് എന്നിവ കൂട്ടിച്ചേർത്ത് കേന്ദ്രഭരണ പ്രദേശമായി പ്രഖ്യാപിക്കണമെന്നും അദ്ദേഹം ആവശ്യപ്പെട്ടു.
“ഞങ്ങളുടെ പ്രദേശത്ത് 100 ഗോത്ര ‘മുഖിയ’കളുണ്ട്, പക്ഷേ അവരുടെ ഭർത്താക്കന്മാർ മുസ്ലീങ്ങളാണ്… മാൾഡയിലെയും മുർഷിദാബാദിലെയും ആളുകൾ ഞങ്ങളുടെ ആളുകളെ പുറത്താക്കുകയും ഹിന്ദു ഗ്രാമങ്ങൾ ശൂന്യമാവുകയും ചെയ്തതിനാൽ പാകൂരിലെ താരാനഗർ-ഇലാമി, ദഗാപര എന്നിവിടങ്ങളിൽ കലാപം പൊട്ടിപ്പുറപ്പെട്ടിട്ടുണ്ട്.
ഞാൻ ഇത് രേഖാമൂലം പറയുന്നു, ഞാൻ പറയുന്നത് തെറ്റാണെങ്കിൽ രാജിവയ്ക്കാൻ തയ്യാറാണ്. ജാർഖണ്ഡ് പോലീസിന് ഒന്നും ചെയ്യാനാകുന്നില്ല…കിഷൻഗഞ്ച്, അരാരിയ, കതിഹാർ, മാൾഡ, മുർഷിദാബാദ് എന്നിവ കേന്ദ്രഭരണ പ്രദേശമാക്കണം, അല്ലാത്തപക്ഷം ഹിന്ദുക്കൾ അപ്രത്യക്ഷമാകും, എൻ ആർ സി നടപ്പിലാക്കണം . ഇനി മറ്റൊന്നും കഴിഞ്ഞില്ലെങ്കിൽ സഭയുടെ ഒരു കമ്മിറ്റിയെ അവിടെ അയക്കുക, മതപരിവർത്തനത്തിനും വിവാഹത്തിനും അനുമതി അനിവാര്യമാണെന്ന 2010 മുതൽ ലോ കമ്മീഷൻ റിപ്പോർട്ട് നടപ്പിലാക്കുക, ”അദ്ദേഹം പറഞ്ഞു.
